திருப்பதி கோவில் குறித்து திரைப்படம்

புதுடில்லி: உலக புகழ் பெற்ற திருப்பதி திருமலை கோவில் குறித்த, மிக விரிவான, நேரடியாக படம் பிடிக்கப்பட்ட திரைப்படம், டிவி சேனலில் ஒளிபரப்பாகி உள்ளது. ஆந்திராவில் அமைந்துள்ள, திருப்பதி திருமலை கோவிலில் தரிசனம் செய்வதற்கு, உள்நாட்டில் இருந்தும், வெளிநாடுகளில் இருந்தும் மக்கள் குவிந்து வருகின்றனர். திருமலை வெங்கடேஸ்வர பெருமாள் குறித்து, பல்வேறு திரைப்படங்கள் வந்துள்ளன. முதன்முறையாக, கோவிலின் பல்வேறு பகுதிகளில், நேரடியாக, கோவிலின் சிறப்பம்சம் குறித்து விளக்கும் விதமாக எடுக்கப்பட்டுள்ள திரைப்படம், நேஷனல் ஜியாகரபி என்ற, டிவி சேனலில் நேற்று ஒளிபரப்பானது. இந்த படத்தை எடுத்துள்ள, ஆவணப் படங்கள் எடுத்து வரும், ராஜேந்திர ஸ்ரீவத்சா கோண்டபள்ளி கூறியதாவது: உலகின் மிகப்பெரிய சமையலறை என்ற பெயரில், திருமலை கோவில் சமையலறை குறித்து படம் எடுக்க விரும்பினோம். அதற்கான அனுமதி கிடைத்து, படம் எடுத்தோம். அப்போது தான், இந்த கோவிலின் பல்வேறு சிறப்பம்சங்கள் குறித்து தெரிய வந்தது. அதை தொடர்ந்து, கோவில் ஆகம விதிகளை மீறாமல், கோவிலின் பல்வேறு பகுதிகள் குறித்தும் படம் எடுத்தோம். கோவிலின் கருவறை, பக்தர்களை வரிசையில் ஒழுங்குபடுத்தும் முறை என, பல பிரமிப்புகள், இந்த படத்தை பார்க்கும் போது ஏற்படும். இவ்வாறு அவர் கூறினார்.