அப்பம் வினியோகம் பாதிப்பு : சபரிமலையில் பக்தர்கள் தவிப்பு!

சபரிமலை : பக்தர்களுக்கு விற்பனை செய்ய, சபரிமலையில் தயாரிக்கப்பட்ட அப்பத்தை, பாக்கெட்டில் நிரப்பும் பணிக்கு ஆட்கள் பற்றாக்குறை காரணமாக, அப்பம் விற்பனை பாதிக்கப்பட்டுள்ளது. கேரள மாநிலம், பத்தனம்திட்டா மாவட்டம் சபரிமலை அய்யப்பன் கோவிலில், தற்போது மண்டல பூஜை உற்சவம் நடந்து வருகிறது. இதில், நாட்டின் பல பகுதிகளில் இருந்தும் ஆயிரக்கணக்கான பக்தர்கள் குவிந்து தரிசனம் செய்து வருகின்றனர். இவ்வாறு வரும் பக்தர்கள், கோவிலில் இருந்து பிரசாதமாக அரவணை, அப்பம் ஆகியவற்றை வாங்கி, தங்களுடன் எடுத்துச் செல்கின்றனர். இவ்வாறு பக்தர்களுக்கு வினியோகிக்க, 17 லட்சம் அரவணை டின்கள் தயார் நிலையில் வைக்கப்பட்டு விற்பனை நடந்து வருகிறது. ஆனால், அப்பம் தயாரிக்கப்பட்டதும், அதை பாக்கெட்டுகளில் அடைக்க 12 பேர் தற்காலிகமாக நியமிக்கப்பட்டு, அவர்கள் பணியில் இருந்து வந்தனர். சில தினங்களாக, அவர்கள் அனைவரும் திடீரென விடுப்பில் சென்று விட்டனர். புதிய ஆட்களை நியமிக்கவும் இல்லை. இதனால், அப்பம் விற்பனை ஸ்தம்பிக்கும் நிலை ஏற்பட்டுள்ளது. இதை தவிர்க்க, தேவஸ்வம் போர்டு அப்பத்தை சூடாக விற்பனை செய்யும் நடவடிக்கைகளில் ஈடுபட்டுள்ளது. இருப்பினும், பக்தர்களுக்கு போதுமான அப்பம் கிடைக்காமல் தவித்து வருகின்றனர். இப்பிரச்னை தீர நடவடிக்கை எடுக்கப்பட்டு வருவதாகக் கூறப்பட்டது.