அதிக மகசூலுக்கு விதை நேர்த்தி

'விளையும் பயிர் முளையிலே தெரியும்' என்பது பழமொழி. தரமான விதைகளை பயன்படுத்தினால் மட்டுமே விதைகள் சீராக முளைத்து தேவையான பயிர் எண்ணிக்கை, சீரான பயிர் வளர்ச்சி, கலப்பிடமில்லாத பயிர் மற்றும் ஒரே நேரத்தில் அறுவடைக்கு வந்து அதிக மகசூல் கிடைப்பதுடன் விளை பொருட்களுக்கு நியாயமான விலையும் கிடைக்கும். விவசாயத்தில் முழு முதல் காரணியான விதை தேர்வினை சரியாக மேற்கொள்ளா விட்டால் உழைப்பும், பணமும் வீணாகும். எனவே, விதை தேர்வில் அலட்சியம் கூடாது.நல்ல முளைப்புத்திறன் உள்ள விதைகளே சீராக வளர்ந்து சிறப்பான மகசூல் தரும். நிர்ணயிக்கப்பட்ட முளைப்புத்திறன் நெல்லுக்கு 80 சதவீதம், மக்காச்சோளம் 90, சோளம், கம்பு மற்றும் சிறுதானிய பயிர்களுக்கு 75, பயறு வகைகள் 75, எள் 80 சதவீதம் இருந்தால் மட்டுமே போதிய பயிர் எண்ணிக்கை பராமரிக்கப்பட்டு அதிக மகசூல் கிடைக்கும். நிர்ணயிக்கப்பட்ட ஈரப்பதம் இருந்தால் நல்ல முளைப்புத் திறன், சீரான வளர்ச்சி, நல்ல விளைச்சல் இருக்கும்.விதையின் ஈரப்பதம் பயிருக்கு தகுந்தவாறு 7 சதவீதம் முதல் 13 சதவீதம் வரை தேவை. அதற்கு கூடுதலா கவோ குறைவாகவோ ஈரப்பதம் இருந்தால் விதையின் ஆயுட்காலம் மற்றும் முளைப்புத்திறன் குறைந்து விடும். இதற்கு விதை பரிசோதனை மிகவும் அவசியம். மாவட்டம் தோறும் விதை பரிசோதனை நிலையத்தில் விதை மாதிரிகளை கொடுத்து விதை முளைப்பு திறன் குறித்து குறைந்த செலவில் பரிசோதனை செய்வது மகசூல் அதிகரிக்க உதவும்.- கு.சிவ.அமுதன்விதை பரிசோதனை அலுவலர்விதை பரிசோதனை நிலையம், மதுரை.