தங்கவயலில் ஜூலை 12ல் மாரத்தான் போட்டி 

தங்கவயல்: தங்கவயலில், 'பெஸ்ட்' என்ற பியாண்ட் எக்ஸலன்ஸ் ஸ்போர்ட்ஸ் டிரஸ்ட் சார்பில், ஜூலை 12ல், 'ஹெரிடேஜ் அல்ட்ரா - 2026 மாரத்தான் போட்டி தொடர்பாக, தங்கவயல் காங்கிரஸ் எம்.எல்.ஏ., ரூபகலா தலைமையில் நேற்று ஆலோசனை கூட்டம் நடந்தது. எம்.எல்.ஏ., ரூபகலா பேசுகையில், ''தங்கவயல் நகரம் மற்றும் கிராமப்புற பகுதிகள் வழியாக, 3.5 கி.மீ., 5 கி.மீ., 12 கி.மீ., 40 கி.மீ., 50 கி.மீ., 70 கி.மீ. துார மாரத்தான் போட்டிகள் நடக்கவுள்ளது. ஓட்டபந்தயத்தில் அனுபவம் உள்ளவர்களுக்கும், மருத்துவப் பரிசோதனையில் தகுதி பெறுபவர்களுக்கு மட்டுமே போட்டியில் பங்கேற்க அனுமதி வழங்கப்படும். ''தங்கவயல் நகரம், விளையாட்டு வீரர்களுக்கு தாயகமாகத் திகழ்கிறது. விளையாட்டு நடவடிக்கைகளுக்கு ஏற்ற சூழலும் இங்கு நிலவுகிறது,'' என்றார்.