சித்து வீடியோ வழக்கில் போலீசார் திணறல் ஏன்?

பெங்களூரு: முன்னாள் முதல்வர் சித்தராமையாவை பற்றி பெண் ஒருவர் பேசும் வீடியோ, இன்ஸ்டாகிராம் சமூகவவலைதளத்தில் வெளியாகி பரபரப்பை ஏற்படுத்தியது. இதுபற்றி விவாதிக்கவும், செய்தி வெளியிடவும் நீதிமன்றத்தில், சித்தராமையா தடை உத்தரவு வாங்கியுள்ளார். சி.சி.பி., போலீசாரிடம், வீடியோ குறித்து விசாரிக்க புகாரும் அளித்தார். ம.ஜ.த., தொண்டர்கள் இருவரை பிடித்து போலீசார் விசாரித்தனர். பின், அவர்கள் விடுவிக்கப்பட்டனர். இந்நிலையில், வீடியோவில் இருக்கும் பெண், யார் என்பதை கண்டறிந்த போலீசார், அவரிடமும் விசாரணை நடத்தி உள்ளனர். ஆனால் இந்த வீடியோவை சமூக வலைத்தளத்தில் பதிவேற்றியது யார், எந்த ஐ.பி., முகவரியில் பதிவேற்றினர், எங்கிருந்து பதிவேற்றினர் என்பதற்கான ஆதாரம் கிடைக்காததால், வழக்கின் அடுத்தகட்ட விசாரணையை நடத்த முடியாமல் போலீசார் திணறுகின்றனர். ஏதாவது ஒரு தடயம் கிடைக்காதா என்று காத்து கொண்டிருக்கின்றனர்.