அமேசானில் 30,000 பேர் ஆட்குறைப்பு

வாஷிங்டன்:தொழில்நுட்பத் துறையில் முன்னெப்போதும் இல்லாத அளவிற்கு ஊழியர்கள் பணிநீக்கம் செய்யப்பட்டு வரும் நிலையில், உலகின் முன்னணி நிறுவனமான அமேசான் தனது வரலாற்றிலேயே இதுவரை இல்லாத அளவாக ஊழியர்களை பணிநீக்கம் செய்ய தயாராகி வருகிறது. அமேசான் நிறுவனத்தின் கார்ப்பரேட் பிரிவில் 30,000 பேரை பணிநீக்கம் செய்ய இருப்பதாகவும், அதற்கான தகவல் மின்னஞ்சல் வாயிலாக ஊழியர்களுக்கு அனுப்பப்படுவதாகவும் தகவல்கள் வெளியாகியுள்ளன. ஆட்குறைப்பு நடவடிக்கை குறித்து அமேசான் இதுவரை அதிகாரப்பூர்வ அறிவிப்பை வெளியிடவில்லை. இந்நிறுவனம், கடந்த 2022ல் 27,000 ஊழியர்களை பணிநீக்கம் செய்திருந்தது. உலகம் முழுவதும் 15.40 லட்சம் ஊழியர்கள் அமேசான் நிறுவனத்தில் பணிபுரிகின்றனர். இதில், கிட்டதட்ட 3.50 லட்சம் பேர் கார்ப்பரேட் பிரிவில் உள்ளனர்.