பாதுகாப்பு துறைக்கு தேவை ஆர்டர்கள்தான்

புதுடில்லி:இந்தியாவின் பாதுகாப்புத்துறை உற்பத்திக்கு அரசின் துணிகர முதலீடுகள் தேவையில்லை, மாறாக, அரசாங்க ஆர்டர்களும், ஒப்பந்தங்களுக்கு விரைவான ஒப்புதலும் கிடைத்தாலே போதும் என்று பாதுகாப்புத் துறை செயலர் ராஜேஷ் குமார் சிங் தெரிவித்தார். டில்லியில் நடைபெற்ற தேசிய பாதுகாப்பு மாநாட்டில அவர் பேசியதாவது: பாதுகாப்புத்துறையில் ஸ்டார்ட் அப், எம்.எஸ்.எம்.இ., நிறுவனங்கள் வளர வேண்டுமென்றால், அவர்களுக்கு ஆர்டர்களை கொடுக்க வேண்டும். அது கிடைத்தால் அவர்களுக்கு முதலீடு கிடைப்பதில் கஷ்டமே இருக்காது. ஈர்க்க வேண்டுமென்றால் ஆர்டர்கள் கிடைப்பது, ஒப்பந்தங்கள் உடனடியாக கையெழுத்தாவது, கொள்முதல் ஆகியவை சீராக இருந்தாலே போதுமானது. இந்தியாவில் துணிகர முதலீட்டு நிறுவனங்கள் வலுவாக இருக்கின்றன. பாதுகாப்புத்துறையில் ஸ்டார்ட் அப் நிறுவனங்களில் முதலீடு செய்ய அவை ஆர்வம் காட்டுகின்றன. பாதுகாப்புத்துறை பட்ஜெட் ஒதுக்கீட்டை அரசு முழுமையாக பயன்படுத்த வேண்டும். உள்நாட்டு ஒப்பந்தங்களை ஊக்குவிப்பதுடன் தகுதிவாய்ந்த உள்நாட்டு நிறுவனங்களை அடையாளம் காண வேண்டும். இவ்வாறு அவர் கூறினார்.