எங்கு முதலீடுகள் செய்தாலும் செபி செக்கில் பரிசோதியுங்கள் செபி தலைவர் அறிவுரை

“எ ங்கு முதலீடு செய்வதாக இருந்தாலும், செபியின் 'செக் ஆன்லைன்' வசதியில் சோதித்துப் பார்த்தால், நிதி மோசடியில் இருந்து தப்பிக்கலாம்,” என, செபி தலைவர் துஹின் காந்த பாண்டே கூறினார். செபி சார்பில், புதுச்சேரியில் நடந்த முதலீட்டாளர் விழிப்புணர்வுக்கான பிராந்திய கருத்தரங்கில் அவர் பேசியதாவது: இந்தியாவின் முதலீட்டுச் சூழல், மாற்றத்தை கண்டு வருகிறது. ஒவ்வொரு நாளும், ஒரு லட்சம் புதிய டிமேட் கணக்குகள் திறக்கப்படுகின்றன. மியூச்சுவல் பண்டு துறை பத்து ஆண்டுகளில் ஏழு மடங்குக்கு மேல் வளர்ந்துள்ளது. இது, குடும்பங்கள் பாரம்பரிய சேமிப்பு முறையிலிருந்து மாறுவதை குறிக்கிறது. இந்த விரிவாக்கம் ஊக்கமளிக்கிறது. ஆனால், முதலீட்டாளர் பாதுகாப்பு மிக முக்கியம். தொழில்நுட்பத்தின் வாயிலாக சந்தை அணுகல் விரிவடைந்துள்ளதால், புதிய பாதிப்புகளும் அதிகரித்து வருகின்றன. முதலீட்டாளர்களை பாதுகாக்க, கடந்த அக்டோபர் மாதம் 'செபி செக்' என்ற பெயரில் முதலீடு பரிசோதனை இணையவசதி ஏற்படுத்தப்பட்டுள்ளது. இது யு.பி.ஐ., - ஐ.டி., மற்றும் கியூ.ஆர்., குறியீடுகள் வாயிலாக சரியான நபருக்கு பணம் செலுத்தப்படுவதை உறுதி செய்கிறது. முதலீடு செய்வதற்கு முன்பாக இதை செய்தால், ஒரு நிமிடத்துக்குள் அது தகவல் கொடுத்து விடும். நம்மை தற்காத்துக் கொள்ளலாம். இவ்வாறு அவர் பேசினார்.

'அதிக லாபம் ஆபத்துடன் வரும்'

கருத்தரங்கில், என்.எஸ்.இ.,யின் நிர்வாக இயக்குநர் ஆஷிஷ்குமார் சவுகான் பேசியதாவது: இந்தியா வளர, அதற்கு மூலதனமும், செல்வமும் தேவை. அதே நேரத்தில், மோசடிகள், ஏமாற்றுதல் அதிகரித்துள்ளது. வாட்ஸாப் பார்வர்டுகள் மற்றும் சமூக ஊடக ரீல்ஸ்களின் டிப்ஸ், சரிபார்க்கப்படாத கதைகள் மிக வேகமாக பரவுகின்றன. இந்த பங்கு அடுத்த வாரம் நிச்சயம் உயரும் அல்லது செபி ரகசியமாக எதையாவது அறிவிக்க போகிறது, என்று யாராவது உங்களிடம் சொன்னால், நம்ப வேண்டாம். பங்குச்சந்தையில் உத்தரவாதமான லாபம் எதுவும் இல்லை. உங்கள் பணத்தை விரைவாக இரட்டிப்பாக்குவதாக உறுதியளிக்கும் விளம்பரங்கள் போலியானவை. உண்மையான முதலீடுகளின் மதிப்பு ஏற்ற இறக்கத்துடன் தான் இருக்கும். அதிக லாபம் என்பது எப்போதும் அதிக ஆபத்துடன் சேர்ந்தே தான் வரும். இவ்வாறு அவர் பேசினார்.