குடும்பத்துக்காக இல்லை; மக்களுக்காக உழைத்தேன்: இன்னும் ஒரு வாய்ப்பு கேட்கிறார் நிதிஷ் குமார்

பாட்னா: என் குடும்பத்திற்காக அல்ல, மக்கள் அனைவருக்காகவும் உழைத்தேன். இன்னும் ஒரு வாய்ப்பை மக்கள் தர வேண்டும் என பீஹார் முதல்வர் நிதிஷ் குமார் தெரிவித்துள்ளார்.பீஹாரில் முதல்வர் நிதிஷ்குமார் தலைமையில் ஐக்கிய ஜனதா தளம், பா.ஜ., கூட்டணி ஆட்சி நடக்கிறது. 243 தொகுதிகள் கொண்ட இம் மாநில சட்ட சபைக்கு இரு கட்டங்களாக தேர்தல் அறிவிக்கப்பட்டுள்ளது.முதல் கட்ட தேர்தல் வரும் நவ., 6ம் தேதி 121 தொகுதிகளுக்கு நடக்கிறது. இந்நிலையில் முதல் கட்ட ஓட்டுப்பதிவுக்கு ஐந்து நாட்களுக்கு முன்பு இன்று (நவ.,01) நிதிஷ் குமார் வெளியிட்டுள்ள வீடியோவில் கூறியிருப்பதாவது:மக்களுக்கான அனைத்து பணிகளையும் நேர்மையுடனும் கடின உழைப்புடனும் செய்தேன்.ராஷ்ட்ரிய ஜனதா தளம் (ஆர்ஜேடி) அதன் 15 ஆண்டுகால ஆட்சியில், காட்டாட்சி ராஜ்ஜியம் நடந்தது. தேஜ கூட்டணி அரசு சட்டம் ஒழுங்கை மேம்படுத்தவும், பெண்கள் இரவில் தனியாகப் பாதுகாப்பாகப் பயணிக்க முடியும் என்பதை உறுதி செய்யவும் பாடுபட்டது. முன்னதாக, மாநிலத்தில் சட்டம் ஒழுங்கு மிகவும் மோசமாக இருந்தது. முதலாவதாக, அதை மேம்படுத்துவதற்கான பணிகள் மேற்கொள்ளப்பட்டன. மேலும், கல்வி, சுகாதாரம், சாலைகள், மின்சாரம், நீர் வழங்கல், விவசாயம் மற்றும் இளைஞர்களுக்கான வேலைவாய்ப்பு ஆகியவற்றின் நிலைமை கணிசமாக மேம்படுத்தப்பட்டுள்ளது. காங்கிரஸ்-ராஷ்டிரிய ஜனதா தள கூட்டணி பெண்களுக்கு எதுவும் செய்யவில்லை. தேசிய ஜனநாயக கூட்டணி அரசு பெண்களுக்கு அதிகாரம் அளிப்பதை உறுதி செய்தது. ஆரம்பத்திலிருந்தே, ஹிந்துக்கள், முஸ்லிம்கள், உயர் ஜாதியினர், பிற்படுத்தப்பட்டோர், மிகவும் பிற்படுத்தப்பட்டோர், தலித்துகள் மற்றும் மகா தலித்துகள் என அனைத்து சமூகப் பிரிவுகளின் வளர்ச்சிக்காகவும் நாங்கள் பாடுபட்டு வருகிறோம். முன்பு பீஹாரி என்று அழைக்கப்படுவது அவமானம், ஆனால் இப்போது அது மரியாதைக்குரிய விஷயம். பிரதமர் மோடி தலைமையிலான மத்திய அரசு பீஹாரின் வளர்ச்சிப் பயணத்திற்கு முழு ஆதரவையும் அளித்து வருகிறது. தேசிய ஜனநாயக கூட்டணியால் மட்டுமே பீஹாரை மேம்படுத்த முடியும். மத்தியிலும் மாநிலத்திலும் தேசிய ஜனநாயக கூட்டணி அரசுகள் இருவருமே ஆட்சி செய்வதால் வளர்ச்சியின் வேகம் அதிகரித்துள்ளது. தேஜ கூட்டணி ஆட்சியைத் தக்க வைத்துக் கொண்டால் பீஹார் மேலும் வளர்ச்சியடையும். எங்களுக்கு இன்னொரு வாய்ப்பு கொடுங்கள். பீஹார் மாநிலத்தை முன்னணி மாநிலங்களில் ஒன்றாக மாற்றும் வகையில் நாங்கள் அதை மேம்படுத்துவோம். எனவே, தயவுசெய்து தேசிய ஜனநாயகக் கூட்டணிக்கு அதிக எண்ணிக்கையில் மக்கள் ஓட்டளிக்க வேண்டும். இவ்வாறு நிதிஷ்குமார் கூறியுள்ளார்.