பாரதத்தின் மகத்தான வலிமைக்கு இளைஞர்களே காரணம் மனதின் குரல் நிகழ்ச்சியில் பிரதமர் பெருமிதம்

புதுடில்லி: ''வளர்ந்த பாரதத்தின் மகத்தான வலிமைக்கு, நம் இளைஞர்களின் அர்ப்பணிப்பே காரணம்,' ' என, பிரதமர் நரேந்திர மோடி புகழாரம் சூட்டிஉள்ளார். 'மனதின் குரல்' என்ற வானொலி நிகழ்ச்சி மூலம் மாதந்தோறும் கடைசி ஞாயிற்றுக்கிழமைகளில், பிரதமர் மோடி நாட்டு மக்களுடன் உரையாற்றி வருகிறார். அந்த வகையில், நேற்றைய மனதின் குரல் நிகழ்ச்சியில் பிரதமர் மோடி பேசியதாவது: தெலுங்கானா மாநிலம் ஹைதராபாதில் அமைந்துள்ள தனியார் விண்வெளி நிறுவனமான 'ஸ்கைரூட்' அத்துறையில் சாதித்து வருகிறது. கடந்த வாரம் நம் விண்வெளித் துறையை ஊக்குவிக்கும் வகையில் 'விக்ரம் - 1' ராக்கெட்டை அந்நிறுவனம் அறிமுகம் செய்தது. இது, நம் நாட்டின் புதிய சிந்தனை, புத்தாக்கம் மற்றும் இளைஞர் சக்தியை பிரதிபலிக்கிறது. ஜி.பி.எஸ்., எனப்படும் இருப்பிடத்தை காட்டும் தொழில்நுட்ப உதவி இல்லாமல், 'ட்ரோன்' எனப்படும் ஆளில்லா சிறிய விமானங்களை இயக்குவதற்கான மென்பொருளை நம் இளைஞர்கள் கண்டுபிடித்துள்ளனர். இது செவ்வாய் கிரகத்தில் ட்ரோன்களை பறக்கவிடுவதற்கு உதவியாக இருக்கும். இதற்காக இந்த நவீன சாப்ட்வேரை ட்ரோன்களில் பொருத்தி, செவ்வாய் கிரகத்துக்கு ஒப்பான ஒரு இடத்தில் பறக்கவிட்டு நம் இளைஞர்கள் சாதித்துள்ளனர். ஆனால், இந்த சாதனை அவர்களுக்கு அவ்வளவு எளிதில் கிடைத்துவிடவில்லை. இதற்காக பல சோதனைகள் நடத்தி, பல தோல்விகளுக்குப் பிறகே வெற்றியை ருசித்துஉள்ளனர். தோல்விகளுக்குப் பின் கிடைக்கும் வெற்றி புதிய நம்பிக்கையை ஊட்டும். வெற்றி வேட்கைக்கான தீச்சுடர் நம் இளைஞர்களின் கண்களில் மின்னியதை நான் கண்கூடாக கண்டேன். நம் இளைஞர்கள் மற்றும் நம் விஞ்ஞானிகளின் அர்ப்பணிப்பு உணர்வை ஒவ்வொரு முறையும் நான் காணும்போது, எனது உள்ளம் பூரிப்பு அடைகிறது. இளைஞர்களின் இந்த மகத்தான அர்ப்பணிப்பு உணர்வு தான் வளர்ந்த பாரதத்தின் மகத்தான வலிமை. இவ்வாறு அவர் பேசினார்.

'அனைவரும் தமிழ் மொழி கற்க வேண்டும்'

''தமிழ்மொழியை அனைவரும் கற்க வேண்டும். தமிழ் கற்க அனைவரும் காசி தமிழ் சங்கமம் நிகழ்ச்சிக்கு வாருங்கள்,'' என, பிரதமர் மோடி அழைப்பு விடுத்துள்ளார். மனதின் குரல் நிகழ்ச்சியில் இது குறித்து அவர் கூறியதாவது: உத்தர பிரதேச மாநிலம் வாரணாசியில் நான்காவது ஆண்டாக காசி தமிழ் சங்கமம் நிகழ்ச்சி நாளை துவங்குகிறது. இந்த ஆண்டுக்கான காசி தமிழ் சங்கமம் நிகழ்ச்சி சுவாரஸ்யமான கருப்பொருளை தாங்கி வந்து இருக்கிறது. தமிழ் கற்கலாம் என்பது தான் அந்த கருப்பொருள். எனவே, அனைவரும் தமிழ்மொழியை கற்க காசி தமிழ் சங்கமத்திற்கு வாருங்கள். தமிழகத்தில் இருந்து வரும் சகோதர, சகோதரிகளை வரவேற்க காசி மக்கள் மிகுந்த ஆர்வமுடன் இருக்கின்றனர். தமிழகம் மற்றும் கேரள மக்கள் மகிழ்ச்சியடையும் வகையில், ஐ.என்.எஸ்., மாஹே நீர்மூழ்கி எதிர்ப்பு கப்பலின் முகப்பில் இரு மாநிலங்களின் பெருமையை உணர்த்தும் உருமி சுருள்வாள் மற்றும் களரிபயட்டுக்கான வீர விளையாட்டு சின்னங்கள் பொருத்தப்பட்டுள்ளன. ஜி - 20 உச்சி மாநாட்டின் போது தென் ஆப்ரிக்க அதிபருக்கு வெண்கல நடராஜர் சிலையை பரிசாக அளித்தேன். தஞ்சையின் புராதன கலாசாரத்திற்கும், சோழர்களின் கைவினை கலைக்கும் நடராஜர் சிலை மிக சிறந்த எடுத்துக்காட்டு. இவ்வாறு அவர் கூறினார். காசி தமிழ் சங்கமம் நிகழ்ச்சி நடக்கும் வாரணாசி, பிரதமர் மோடியின் லோக்சபா தொகுதியாகும்.