மிகவும் எளிய முறையில் நடந்த முதல்வரின் மகன் திருமணம்

உஜ்ஜைனி: மத்திய பிரதேச முதல்வர் மோகன் யாதவின் இளைய மகன் அபிமன்யு யாதவின் திருமணம் மிகவும் எளிய முறையில் நடந்தது. திருமணம் என்றாலே ஆடம்பரம் தான். நடுத்தர வர்க்கத்தினர் கூட கடன் வாங்கியாவது தங்கள் மகன் அல்லது மகளின் திருமணத்தை ஆடம்பரமாக நடத்த வேண்டும் என, விரும்புவர். இதில், வி.வி.ஐ.பி.,க்கள், பிரபலங்கள் பற்றி சொல்லவே தேவையில்லை. அவர்களின் இல்ல திருமண விழாக்கள் சொகுசு விடுதிகளில் ஆடம்பரமாக நடத்தப்படும். ஒரு சிலர், வெளிநாடுகளிலும் திருமணங்களை நடத்துகின்றனர். ஆனால், பா.ஜ.,வைச் சேர்ந்த ம.பி., முதல்வர் மோகன் யாதவோ, தன் இளைய மகன் அபிமன்யு யாதவின் திருமணத்தை எந்தவித பந்தாவும் இல்லாமல் எளிய முறையில் நடத்தி உள்ளார். உஜ்ஜைனி மாவட்டத்தில் நேற்று, முதல்வர் மோகன் யாதவ் ஏற்பாட்டில், 22 ஜோடிகளுக்கு திருமணம் நடந்தது. இதில் ஒரு ஜோடியாக, அபிமன்யு - இஷிதா ஜோடி எளிய முறையில் திருமணம் செய்து கொண்டனர். சமத்துவம், ஒற்றுமை, பகிரப்பட்ட கொண்டாட்டம் ஆகியவற்றை பிரதிபலிக்கும் வகையில், இந்த திருமண நிகழ்வு அமைந்தது. மணமக்கள் அபிமன்யு யாதவ் - இஷிதா, பாரம்பரிய முறையில் மாட்டு வண்டியில் அழைத்து வரப்பட்டனர். இது தொடர்பான வீடியோ, சமூக வலைதளங்களில் வெளியாகி பலரையும் ஆச்சரியப்படுத்தியது. இதைத் தொடர்ந்து நடந்த திருமண வரவேற்பு விழாவில், பல மாநிலங்களின் கவர்னர்கள், முதல்வர்கள் பங்கேற்றனர்.