மருந்துகள் தொடர்பான ஆராய்ச்சி பணிகள்(கிளீனிக்கல் ரிசர்ச்)
ஒரு மருந்தானது, நோயாளிகளிடம் எவ்வாறு செயல்படுகிறது என்பதை ஆய்வு செய்வது கிளீனிக்கல் ரிசர்ச்(மருந்துகள் தொடர்பான ஆராய்ச்சி) எனப்படும். இதுபோன்ற ஆய்வுகள், மருந்து தயாரிப்பு நிறுவனங்களால் நடத்தப்படுகின்றன. மருந்துகள் பெரியளவில் பயன்பாட்டிற்கு வருகையில், பக்கவிளைவுகள் மற்றும் பாதுகாப்பை ஆய்வுசெய்வதற்கே இந்த சோதனைகள் நடத்தப்படுகின்றன. இதன் முக்கிய நோக்கம், புதிய மருந்துகளை சந்தையில் அறிமுகப்படுத்துவதே ஆகும். இவற்றின்மூலம், மனிதர்களுக்கு சிகிச்சையளிக்கும் முறைகளைப் பற்றி நல்ல புரிந்துணர்வு ஏற்படுகிறது. உலகம் முழுவதும் பரவியுள்ள ஏராளமான மருந்து கம்பெனிகள், மருந்துகள் தொடர்பான தங்களின் ஆய்வுகளை மேற்கொள்ள, இந்தியாவையே பெரிதும் விரும்புகின்றன. குறைந்த செலவு, பலவிதமான நோயாளிகள், ஆராய்ச்சி செய்வதற்கான உலகத்தரம் வாய்ந்த வசதிகள், முறைப்படுத்தப்பட்ட ஆதரவு மற்றும் அரசினால் வழங்கப்படும் உதவித்தொகை போன்ற காரணங்களால், இந்தியா, மருந்துகள் தொடர்பான ஆராய்ச்சிக்கு உலகளாவிய அளவில் விரும்பப்படுகிறது. எனவே இத்துறையில் அதிகளவிலான நிபுணர்கள் தேவைப்படுகிறார்கள். மருந்துகள் தொடர்பான ஆய்வாளரின் பணிகள்: மருந்தாய்வு நிபுணருடன், மருத்துவரும் கூட, மருந்துகள் தொடர்பான ஆராய்ச்சியாளராக கருதப்படுகிறார். இவர்கள் இருவரும் சேர்ந்து ஒரு நோயாளிக்கு சிகிச்சையளிப்பதற்கான விதிமுறைகளை வகுக்கிறார்கள். அவர்களின் முக்கிய நோக்கமே, தற்போது நடைமுறையில் இருக்கும் ஒரு நோய்க்கு, புதுவிதமான சிகிச்சை முறையைக் கண்டுபிடிப்பதேயாகும். இதுதொடர்பான சோதனைகளை அவர்கள் வடிவமைத்து, நடைமுறைப்படுத்தி மற்றும் கண்காணிக்கிறார்கள். இத்தொழிலுக்குத் தேவையான பண்புகள்: சிறந்த பகுப்பாய்வு திறன், தலைமைத்துவப் பண்பு, சோதனைகளை கண்காணிப்பதற்கான மேலாண்மைத் திறன் மற்றும் சிறந்த வியாபாரத்திறன். மருந்துகள் தொடர்பான ஆராய்ச்சியாளராவதற்கான தகுதிகள்: பள்ளி மேல்நிலைப் படிப்பில், இயற்பியல், வேதியியல் மற்றும் உயிரியல் போன்ற படிப்புகளை படித்திருக்க வேண்டும். எம்.பி.பி.எஸ். படிப்பிலோ அல்லது பாராமெடிக்கல் அல்லது லைப் சயின்ஸ் பிரிவுகளில் பி.எஸ்சி படிப்பிலோ சேர்ந்து இந்த துறையில் நுழையலாம். படிப்பை முடித்து, இதுதொடர்பான பயிற்சிகள் எடுத்து, சிறந்த ஆய்வாளர் ஆகலாம். இத்துறையில் கிடைக்கும் சம்பளம்: ஆரம்ப நிலையில் ஒருவர் வருடத்திற்கு ரூ.3,00,000 பெறுகிறார், இடைநிலையில் வருடம் ரூ.7,00,000 பெறுகிறார் மற்றும் அனுபவ நிலையில் வருடத்திற்கு ரூ.15,00,000 வரை பெறுகிறார். இந்தப் படிப்பை எங்கே படிக்கலாம்: இத்துறை சார்ந்த படிப்பை மேற்கொள்ள இந்தியாவிலேயே புகழ்பெற்ற நிறுவனமாக, ஐ.சி.ஆர்.ஐ(Institute of Clinical Research of India) திகழ்கிறது. இதன் பிற வளாகங்கள், பெங்களூர், டெஹ்ராடூன், அகமதாபாத், ஐதராபாத் மற்றும் மும்பை போன்ற இடங்களில் உள்ளன. இந்த நிறுவனத்தில் கீழ்கண்ட படிப்புகள் வழங்கப்படுகின்றன: * மேம்படுத்தப்பட்ட கிளீனிக்கல் ரிசர்ச் -ல் முழுநேர முதுநிலை டிப்ளமோ. * கிளீனிக்கல் ரிசர்ச் -ல் முழுநேர எம்.எஸ்சி. * கிளீனிக்கல் ரிசர்ச் மேலாண்மையில் முழுநேர எம்.எஸ்சி. * கிளீனிக்கல் தரவு மேலாண்மையில் பகுதிநேர முதுநிலை டிப்ளமோ * கிளீனிக்கல் ரிசர்ச் -ல் பகுதிநேர முதுநிலை டிப்ளமோ. * கிளீனிக்கல் சோதனை மேலாண்மையில் பகுதிநேர முதுநிலை டிப்ளமோ. * பார்மகோவிஜிலன்ஸ் -ல் பகுதிநேர முதுநிலை டிப்ளமோ. * செவிலியர்களுக்கான கிளீனிக்கல் ரிசர்ச் -ல் பகுதிநேர முதுநிலை சான்றிதழ். * செவிலியர்களுக்கான கிளீனிக்கல் ரிசர்ச் -ல் பகுதிநேர சான்றிதழ். இவைத்தவிர இன்னும் சில படிப்புகளும் வழங்கப்படுகின்றன. அதைப்பற்றிய விவரங்கள் மற்றும் அவற்றில் சேர்வதற்கான தகுதிகளை அறிந்துகொள்ள ஐ.சி.ஆர்.ஐ. அதிகாரப்பூர்வ இணையதளம்(www.icriindia.com) செல்லவும். கிளீனிக்கல் ரிசர்ச் -ல் படிப்புகளை வழங்கும் இதர கல்வி நிறுவனங்கள்: 1) ஏ.சி.இ - மும்பை 2) பார்மசூடிகல் கல்வி மற்றும் ஆராய்ச்சிக்கான தேசிய கல்வி நிறுவனம் - ஐதராபாத் 3) மும்பை பார்மசி கல்லூரி - மும்பை