சென்னை-கோவா டிரா: ஐ.எஸ்.எல்., கால்பந்தில் விறுவிறு

சென்னை: சென்னை, கோவா அணிகள் மோதிய ஐ.எஸ்.எல்., கால்பந்து லீக் போட்டி 2-2 என 'டிரா' ஆனது.இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. சென்னையில் நடந்த லீக் போட்டியில் சென்னை, கோவா அணிகள் மோதின. ஆட்டத்தின் 11வது நிமிடத்தில் சென்னையின் வில்மர் ஜோர்டான் கில் ஒரு கோல் அடித்தார். இதற்கு, 45வது நிமிடத்தில் ஆகாஷ் சங்வான் துாக்கி அடித்த பந்தை கோவாவின் உதாந்தா சிங் தலையால் முட்டி கோல் அடித்து பதிலடி கொடுத்தார். முதல் பாதி முடிவு 1-1 என சமநிலையில் இருந்தது.இரண்டாவது பாதியின் 51வது நிமிடத்தில் கோவா அணிக்கு கிடைத்த 'பெனால்டி' வாய்ப்பில் அர்மான்டோ சாதிக்கு ஒரு கோல் அடித்து கைகொடுத்தார். ஆட்டத்தின் 79வது நிமிடத்தில் எழுச்சி கண்ட சென்னை அணிக்கு டேனியல் சிமா ஒரு கோல் அடித்தார். தொடர்ந்து போராடிய இரு அணியினரால் கூடுதலாக கோல் அடிக்க முடியவில்லை.ஆட்டநேர முடிவில் போட்டி 2-2 என்ற கணக்கில் 'டிரா' ஆனது. சென்னை அணி 5 போட்டியில், 2 வெற்றி, 2 'டிரா', ஒரு தோல்வி என 8 புள்ளிகளுடன் 5வது இடத்துக்கு முன்னேறியது. கோவா அணி ஒரு வெற்றி, 3 'டிரா', 2 தோல்வி என 6 புள்ளிகளுடன் 8வது இடத்தில் உள்ளது.