பெங்கால் திரில் வெற்றி: புரோ கபடி லீக் போட்டியில்

சென்னை: புரோ கபடி லீக் போட்டியில் பெங்கால் அணி 37-36 என, டில்லியை வீழ்த்தியது.இந்தியாவில், புரோ கபடி லீக் 12வது சீசன் நடக்கிறது. தமிழ் தலைவாஸ், 'நடப்பு சாம்பியன்' ஹரியானா, மும்பை, பெங்களூரு உள்ளிட்ட 12 அணிகள் பங்கேற்கின்றன. சென்னையில் நடந்த லீக் போட்டியில் பெங்கால், டில்லி அணிகள் மோதின.டில்லி வீரர்களை 'ஆல்-அவுட்' செய்த பெங்கால் அணி, முதல் பாதி முடிவில் 19-18 என முன்னிலையில் இருந்தது. இரண்டாவது பாதியில் இரு அணிகளும் தலா 18 புள்ளி பெற்றன. ஆட்டநேர முடிவில் பெங்கால் அணி 37-36 என்ற கணக்கில் 'திரில்' வெற்றி பெற்றது.பெங்கால் அணிக்கு கேப்டன் தேவங்க் (12 புள்ளி), ஹிமான்ஷு நார்வல் (6), ஆஷிஸ் (5) கைகொடுத்தனர். டில்லி அணி சார்பில் நீரஜ் நார்வல் 6, அஜின்கியா பவார் 5 புள்ளி பெற்றனர்.பெங்கால் அணி 11 போட்டியில், 4 வெற்றி, 7 தோல்வி என, 8 புள்ளிகளுடன் 9வது இடத்துக்கு முன்னேறியது. இரண்டாவது தோல்வியை பெற்ற டில்லி அணி (22 புள்ளி) முதலிடத்தில் நீடிக்கிறது.