இங்கிலாந்து அணி கோல் மழை: ஜூனியர் உலகக்கோப்பை ஹாக்கியில்

மதுரை: ஜூனியர் உலகக்கோப்பை ஹாக்கி லீக் போட்டியில் கோல் மழை பொழிந்த இங்கிலாந்து அணி 13-0 என ஆஸ்திரியாவை வென்றது.சென்னை, மதுரையில், 21 வயதுக்கு உட்பட்டோருக்கான ஜூனியர் உலகக்கோப்பை ஹாக்கி 14வது சீசன் நடக்கிறது. மொத்தம் 24 அணிகள், 6 பிரிவுகளாக லீக் சுற்றில் பங்கேற்கின்றன.மதுரையில் உள்ள ரேஸ்கோர்ஸ் சர்வதேச ஹாக்கி மைதானத்தில் நடந்த 'ஈ' பிரிவு லீக் போட்டியில் இங்கிலாந்து, ஆஸ்திரியா அணிகள் மோதின. இதில் கோல் மழை பொழிந்த இங்கிலாந்து 13-0 என்ற கணக்கில் முதல் வெற்றியை பதிவு செய்தது. இங்கிலாந்து சார்பில் கேடன் டிரேசி 4 (24, 25, 29, 53வது நிமிடம்), ஹென்றி மார்கம் 3 (32, 38, 47வது) கோல் அடித்தனர்.மற்றொரு 'ஈ' பிரிவு லீக் போட்டியில் நெதர்லாந்து, மலேசியா அணிகள் மோதின. இதில் நெதர்லாந்து அணி 6-0 என்ற கோல் கணக்கில் வெற்றி பெற்றது. முதல் போட்டியில் இங்கிலாந்தை வீழ்த்திய நெதர்லாந்து, தொடர்ந்து 2வது வெற்றியை பதிவு செய்தது.ஸ்பெயின் அசத்தல்: 'டி' பிரிவு லீக் போட்டியில் ஸ்பெயின், பெல்ஜியம் அணிகள் மோதின. இதில் ஸ்பெயின் அணி 2-0 என வென்றது. ஏற்கனவே எகிப்தை வீழ்த்திய ஸ்பெயின், தொடர்ந்து 2வது வெற்றியை பெற்றது. மற்றொரு 'டி' பிரிவு போட்டியில் நமீபியா அணி 4-2 என, எகிப்தை வீழ்த்தி முதல் வெற்றியை ருசித்தது.அர்ஜென்டினா-நியூசி., 'டிரா'சென்னையில் உள்ள மேயர் ராதாகிருஷ்ணன் ஹாக்கி மைதானத்தில் நடந்த 'சி' பிரிவு லீக் போட்டியில் நியூசிலாந்து, அர்ஜென்டினா அணிகள் மோதின. விறுவிறுப்பான இப்போட்டி 3-3 என்ற கணக்கில் 'டிரா' ஆனது. நியூசிலாந்தின் ஜான்டி எல்ம்ஸ் 'ஹாட்ரிக்' கோல் (4, 32, 39வது நிமிடம்) அடித்தார். அர்ஜென்டினா சார்பில் புருனோ கோரியா 2 (11, 40வது நிமிடம்), மேடியோ டோரிகியானி (2வது) ஒரு கோல் அடித்தனர்.மற்றொரு 'சி' பிரிவு லீக் போட்டியில் ஜப்பான், சீனா அணிகள் மோதின. இதில் ஜப்பான் அணி 3-2 என்ற கோல் கணக்கில் முதல் வெற்றி பெற்றது.'எப்' பிரிவு போட்டியில் தென் கொரியா, வங்கதேசம் அணிகள் மோதின. ஆட்டநேர முடிவில் போட்டி 3-3 என 'டிரா' ஆனது. வங்கதேச அணிக்கு அமிருல் இஸ்லாம் 'ஹாட்ரிக்' கோல் (36, 46, 56வது நிமிடம்) அடித்தார். தென் கொரியா சார்பில் லீ மின்-ஹயுக் 2 (8, 17 வது நிமிடம்), செயுங்-ஹன் சன் (13வது) ஒரு கோல் அடித்தனர். மற்றொரு 'எப்' பிரிவு போட்டியில் பிரான்ஸ் அணி 8-3 என்ற கோல் கணக்கில் ஆஸ்திரேலியாவை வீழ்த்தியது.