உள்வாங்கிய சாலை: போரூரில் அச்சம்

போரூர், போரூர், மவுன்ட் -- பூந்தமல்லி நெடுஞ்சாலையில் சாலை உள்வாங்கியுள்ளதால், விபத்துகள் ஏற்படும் முன் சீர் செய்ய வேண்டும் என, கோரிக்கை எழுந்துள்ளது. பூந்தமல்லி, போரூர் கிண்டி ஆகிய பகுதிகளை இணைக்கும் பிரதான சாலையாக, மவுன்ட் - பூந்தமல்லி நெடுஞ்சாலை உள்ளது. இச்சாலை வழியாக தினமும், லட்சக்கணக்கான வாகனங்கள் செல்கின்றன.இச்சாலையில் இரண்டாம் கட்ட மெட்ரோ ரயில் பணிகள் நடைபெற்று வருகின்றன. இந்நிலையில், போரூர் மேம்பாலம் அருகே, மவுன்ட் - பூந்தமல்லி நெடுஞ்சாலையில் சாலை உள்வாங்கி உள்ளது.இதனால், இருசக்கர வாகன ஓட்டிகள் பள்ளத்தில் தடுமாறி விழும் நிலை உள்ளது. 'மெகா' பள்ளம் ஏற்படும் முன், சாலையின் உள்வாங்கிய பகுதியை சீர் செய்ய வேண்டும் என, வாகன ஓட்டிகள் வேண்டுகோள் விடுத்துள்ளனர்.