மே.வங்கத்திற்கு கடத்த முயன்ற 3 டன் ரேஷன் அரிசி பறிமுதல்

தாம்பரம், தாம்பரம் ரயில் நிலையத்தில் இருந்து, மேற்கு வங்க மாநிலத்திற்கு ரயிலில் கடத்த முயன்ற, 3 டன் ரேஷன் அரிசி மூட்டைகளை, போலீசார் பறிமுதல் செய்தனர். தாம்பரம் ரயில் நிலையத்தில், 3 - 4 பிளாட்பாரத்தை ஒட்டியுள்ள முட்புதரில், ரேஷன் அரிசி மூட்டைகள் மறைத்து வைக்கப்பட்டிருந்ததை, நேற்று காலை ரோந்து சென்ற ரயில்வே பாதுகாப்பு படையினர் கண்டுபிடித்தனர். பின், மறைத்து வைக்கப்பட்டிருந்த, 140 மூட்டைகளை பறிமுதல் செய்தனர். அவற்றின் எடை, 3 டன் என்பது தெரியவந்தது. பின், அவற்றை, தாம்பரம் உணவு பொருள் வழங்கல் துறை அதிகாரிகளிடம் ஒப்படைத்தனர். இது தொடர்பாக, ரயில்வே பாதுகாப்பு படையினர் வழக்கு பதிந்து, ரேஷன் அரிசி கடத்தலில் ஈடுபட்ட நபர்கள் குறித்து விசாரித்து வருகின்றனர்.