அரக்கோணம் - சேலம் ரயில் இன்று முதல் மீண்டும் இயக்கம்

சென்னை:'அரக்கோணம் - சேலம் இடையே இயக்கப்பட்ட பயணியர் ரயில், மீண்டும் இன்று முதல் வழக்கம் போல் இயக்கப்படும்' என, சென்னை ரயில் கோட்டம் அறிவித்துள்ளது. ஒடிசா மாநிலம் பூரி ஜெகன்நாதர் கோவில் ரத யாத்திரையையொட்டி, பக்தர்களின் வசதிக்காக, அங்கு பயணியர் சிறப்பு ரயில் இயக்கப்பட்டது. அரக்கோணம் - சேலம் இடையே இயக்கப்பட்ட பயணியர் ரயில், கடந்த மாதம் 24ம் தேதி, ஒடிசா கொண்டு செல்லப்பட்டு இயக்கப்பட்டது. இதனால், ஒரு மாதமாக இந்த ரயில்கள், அரக்கோணம் - சேலம் வழித்தடத்தில் இயக்கப்படவில்லை. தற்போது, இந்த பயணியர், மீண்டும் சென்னை ரயில் கோட்டத்துக்கு வந்துள்ளன. இதையடுத்து, அரக்கோணம் - சேலம் காலை 5:15, சேலம் - அரக்கோணம் மாலை 3:30 மணி ரயில், இன்று முதல் வழக்கம் போல் இயக்கப்படும் என, சென்னை ரயில் கோட்டம் தெரிவித்துள்ளது.