கவுல்பஜார் ஊராட்சியில் செயலர், வி.ஏ.ஓ., மீது புகார்

பம்மல் பரங்கிமலை ஊராட்சி ஒன்றியத்தில் அடங்கியது, கவுல்பஜார் ஊராட்சி. இவ்வூராட்சியில், 6 வார்டுகள் உள்ளன.இவ்வூராட்சிவாசிகள், வீட்டு வரி, கட்டட அனுமதி, குடிநீர் மற்றும் மின் விளக்கு புகார் உள்ளிட்ட பணிகளுக்காக, நாள்தோறும் ஊராட்சி அலுவலகத்திற்கு வந்து செல்கின்றனர்.ஆனால், இவ்வூராட்சி செயலர், சரியான நேரத்திற்கு பணிக்கு வருவதில்லை என, அப்பகுதிவாசிகள் குற்றச்சாட்டு தெரிவித்துள்ளனர்.இதுகுறித்து அப்பகுதிவாசிகள் கூறியதாவது:கவுல்பஜார் ஊராட்சி செயலர், தினசரி காலை 11:00 மணிக்கு மேல் தான் அலுவலகத்திற்கு வருகிறார். சிறு பணிக்கு கூட அலுவலகத்தில் மணிக்கணக்கில் காத்திருக்க வேண்டியுள்ளது.அதேபோல், கிராம நிர்வாக அலுவலரும், சரியான நேரத்திற்கு பணிக்கு வருவதில்லை. அவரும் தினசரி காலை 11:00 - 11:30 மணிக்கு தான் வருகிறார்.வாரந்தோறும் சனிக்கிழமைகளில் பணிக்கு வருவதே இல்லை. எனவே, இவ்விஷயத்தில் உயர் அதிகாரிகள் தலையிட்டு, இரண்டு அதிகாரிகளும் சரியான நேரத்திற்கு பணிக்கு வரும் வகையில் நடவடிக்கை எடுக்க வேண்டும்.இவ்வாறு அவர்கள் கூறினர்.