மூளைச்சாவு அடைந்த பெண் உடலுறுப்பு தானத்தால் 8 பேருக்கு மறுவாழ்வு

சென்னை: மதுரவாயலை சேர்ந்த, 51வயது பெண் ஒருவர் உடல் நலம் பாதிக்கப்பட்டு, வடபழனி சிம்ஸ் மருத்துவமனையில், அவசர சிகிச்சைக்காக, கடந்த 25ம் தேதி அனுமதிக்கப்பட்டார். எம்.ஆர்.ஐ., பரிசோதனையில், அவருக்கு பின்புற சுழற்சி பக்கவாதம் ஏற்பட்டிருப்பது கண்டறியப்பட்டது. இதையடுத்து, அனைத்து துறை மருத்துவ நிபுணர்கள் கண்காணிப்பில், அவருக்கு தீவிர சிகிச்சை வழங்கப்பட்டது. இருப்பினும், சிகிச்சை பலன் அளிக்காததால், அவர் மூளைச்சாவு அடைந்தார். இதையடுத்து, அவரின் உடல் உறுப்புகள் தானம் செய்யப்பட்டன. அதன் வாயிலாக, எட்டு பேருக்கு மறுவாழ்வு கிடைத்துள்ளது. இதுகுறித்து, சிம்ஸ் மருத்துவமனையின் துணைத் தலைவர் டாக்டர் ராஜு சிவசாமி கூறியதாவது: மூளைச்சாவு அடைந்த பெண்ணின் கணவர் மற்றும் குடும்பத்தினர், உறுப்பு தானம் செய்ய முன்வந்தனர். மூளைச்சாவு உறுதி செய்யப்பட்ட ஒருவருக்கான அனைத்து அவசியமான பரிசோதனைகள் மற்றும் செயல்முறைகள் முடிக்கப்பட்ட பின், அவரது உறுப்புகள் மீட்கப்பட்டன. அவரது, கல்லீரல் மற்றும் ஒரு சிறுநீரகம், சிம்ஸ் மருத்துவமனையில் உள்ள இரண்டு நோயாளிகளுக்கு பொருத்தப்பட்டன. மற்றொரு சிறுநீரகம், இரண்டு நுரையீரல்கள், இதயம் மற்றும் இரண்டு விழித்திரைகள், விதிமுறை பட்டியல்படி தானமாக வழங்கப்பட்டன. இதன்வாயிலாக, 8 பேருக்கு மறுவாழ்வு கிடைத்துள்ளது. இவ்வாறு அவர் கூறினார்.