தினமலர் - பட்டம் வினாடி - வினா போட்டி; பாரதிய வித்யாமந்திர் மாணவர்கள்  ஒவ்வொரு கேள்விக்கும் பளிச் பதில்

பொள்ளாச்சி; 'தினமலர்' நாளிதழ் மாணவர் பதிப்பான, 'பட்டம்' மற்றும் சென்னை இன்ஸ்டிடியூட் ஆப் டெக்னாலஜி சார்பில், 'பதில் சொல்; பரிசை வெல்' என்ற வினாடி --- வினா போட்டி பொள்ளாச்சி பாரதிய வித்யாமந்திர் மெட்ரிக் மேல்நிலைப் பள்ளியில் நடந்தது.பள்ளி மாணவர்களுக்கு அறிவியல் ஆய்வுத்திறன், கணிதம், மொழித்திறனை ஊக்குவிக்கும் வகையில், 'தினமலர்' நாளிதழ் மாணவர் பதிப்பு, 'பட்டம்' இதழ் வெளியிடப்படுகிறது. திங்கள் முதல் வெள்ளி வரை, 'பட்டம்' இதழ் தினமும் பள்ளிகளில் கிடைக்கும்.இதை வாசிக்கும் மாணவர்களை உற்சாகப்படுத்தவும், அவர்களின் கற்றல் சார்ந்த தேடலை விரிவுப்படுத்தும் வகையிலும், 2018 முதல், மெகா வினாடி --- வினா போட்டி நடத்தப்படுகிறது.நடப்பாண்டுக்கான, வினாடி --- வினா போட்டி, 'பட்டம்' மற்றும் சென்னை இன்ஸ்டிடியூட் ஆப் டெக்னாலஜி சார்பில், பொள்ளாச்சி பாரதிய வித்யாமந்திர் மெட்ரிக் மேல்நிலைப் பள்ளியில் நடந்தது. எஸ்.எஸ்.வி.எம்., கல்வி நிறுவனமும் கரம் கோர்த்துள்ளது. 'கோ - ஸ்பான்சர்' ஆக சத்யா ஏஜென்சி இணைந்து உள்ளது.பள்ளியில், நேற்று நடந்த போட்டியில், 50 மாணவர்கள் பங்கேற்றனர். அதிக புள்ளிகள் பெற்ற, 16 பேரை, எட்டு அணிகளாக பிரித்து இறுதிச்சுற்று போட்டி நடந்தது. மூன்று கட்டங்களாக நடந்த இப்போட்டியில், முதல் பரிசை, 'பி' அணியை சேர்ந்த, 8ம் வகுப்பு மாணவர்கள் ஹரிஸ்வா, அம்ரித் ராமசாமி ஆகியோர் வென்றனர்.போட்டியில் பங்கேற்ற மாணவ, மாணவியரை, பள்ளி முதல்வர் பிரேமானந்தி, ஒருங்கிணைப்பாளர் பார்வதி, ஆசிரியர்கள் திலகரத்தினம், ப்ரீத்தி ஆகியோர் பாராட்டி, சான்றிதழ்கள் மற்றும் பதக்கங்களை வழங்கினர்.கோவை, திருப்பூர், நீலகிரி மாவட்டங்களில் இருந்து முன்பதிவு செய்த, 150க்கும் மேற்பட்ட பள்ளிகளை சேர்ந்த மாணவர்கள் இப்போட்டியில் பங்கேற்கின்றனர். முதலிடம் பிடிக்கும் மாணவர்கள், அரையிறுதியில் பங்கேற்பர். இதில் இருந்து எட்டு அணிகள் தேர்வு செய்யப்பட்டு இறுதி போட்டி நடத்தப்படும்.

படிக்கும் ஆர்வத்தை துாண்டும் 'பட்டம்'

பள்ளி முதல்வர் பிரேமானந்தி கூறுகையில், ''அனைத்து துறை சார்ந்த தேடல் மற்றும் பொதுஅறிவையும் பள்ளிக் குழந்தைகள் பெறும் வகையில், 'தினமலர் - பட்டம்' இதழ் உள்ளது. இதனைத் தொடர்ந்து வாசிக்கும் ஒவ்வொரு மாணவரும் உயர்கல்விக்கு தேவையான தகவல்களை பெற முடியும். நாட்டு நடப்புகள் மட்டுமின்றி அறிவியல், கணிதம், பொது அறிவு என, அத்தனை விபரங்களை எளிதில் தெரிந்து கொள்ள முடிகிறது. மாணவர்களின் அறிவு வளர்ச்சிக்கு மட்டுமின்றி, படிக்கும் ஆர்வத்தை துாண்டும் இதழாக 'பட்டம்' இதழ் உள்ளது,'' என்றார்.

பொதுஅறிவு களஞ்சியமான 'பட்டம்'

மாணவர் ஹரிஸ்வா: வினாடி - வினாவில் இடம் பெற்ற கேள்விகள், அனைத்து துறை சார்ந்த தகவல்களை, ஆழமாக கற்றுக் கொள்ள வேண்டும் என்ற எண்ணத்தையும், ஆர்வத்தையும் துாண்டுகிறது. இதன் காரணமாகவே, தொடர்ந்து பட்டம் இதழ் படித்து, வினாடி - -வினா போட்டிக்கு தயாரானேன். அதன் வாயிலாகவே, எங்கள் அணி போட்டியில் வெற்றி பெற்றது. பொது அறிவு தேடலின் களஞ்சியமாக 'பட்டம்' இதழ் பெரிதும் உதவுகிறது.மாணவர் அம்ரித் ராமசாமி: தினமலர் 'பட்டம்' இதழ், படிப்பதால், விசாலமான அறிவை பெற்றுக் கொள்ள முடிகிறது. வழக்கமாக, பாடப்புத்தகம் வாயிலாக தெரிந்து கொள்ளும் தகவல்களைத் தாண்டி, பல அறிய தகவல்களை பட்டம் இதழால் தெரிந்து கொள்கிறேன். தினமும் புதிது புதிதான தகவல்கள் இடம் பெறுவது வியப்படையச் செய்கிறது. இறுதி போட்டியில் வெல்வதை லட்சியமாகக் கொண்டு, தொடர்ந்து 'பட்டம்' இதழ் படித்து வருகிறேன்.