அடிக்கடி மின் தடை: மக்கள் அதிருப்தி

போத்தனூர்: குறிச்சி ஹவுசிங் யூனிட்டிலுள்ள துணை மின் நிலையத்திலிருந்து செல்லும் ஒரு பீடரில் பிள்ளையார்புரம், ஹவுசிங் யூனிட், மதுக்கரை மார்க்கெட் சாலையின் ஒரு பகுதி, முதலியார் வீதி, திருமறை நகர், கருப்பராயன் கோவில் பகுதிகளுக்கு மின் வினியோகம் செய்யப்படுகிறது. இம்மின் வழித்தடத்தில், அடிக்கடி மின் வெட்டு ஏற்பட்டது. குறிப்பாக காலை நேரத்தில் ஏற்பட்ட மின்வெட்டால், பெண்கள் அவதிக்குள்ளாகினர். இதுகுறித்து, நமது நாளிதழில் செய்தி வெளியானது. சில வாரங்கள் மட்டும் நிலைமை சீரானது. தற்போது மீண்டும் மின்வெட்டு துவங்கிவிட்டது. குறிப்பாக நேற்று காலை, 10:00 முதல் 11:30 மணிக்குள்ளாக நான்கு முறை மின்வெட்டு ஏற்பட்டது. இதையடுத்தும் ஒரு முறை மின் வினியோகம் தடைபட்டது.இதனால் மக்கள் அதிருப்தியடைந்துள்ளனர். மின் வாரிய அதிகாரி ஒருவரிடம் கேட்டபோது, இன்று (நேற்று) காலை, 'டிரிப்' ஆனதால் ஒருமுறை மட்டுமே மின் வினியோகம் தடைபட்டது. நான்கு முறை தடைபட்டது தெரியவில்லை. இதுகுறித்து விசாரிக்கிறேன்' என்றார்.