பணம் காய்க்கும் மரம் வளர்ப்பு: விவசாயிகளுக்கு ஆலோசனை

பெ.நா.பாளையம்: பெரியநாயக்கன்பாளையம் அருகே தெக்குபாளையத்தில் உள்ள பாலமலை உழவர் உற்பத்தியாளர் நிறுவனம் சார்பில், வர்த்தக ரீதியான மரம் வளர்ப்பு திட்டம் குறித்த ஒரு நாள் கருத்தரங்கு நடந்தது. மரங்கள் மண்ணின் ஈரப்பதம் மற்றும் ஊட்டச்சத்துக்களை மேம்படுத்தி, விவசாய வேலைகளை குறைக்கின்றன. மேலும், வருமானத்தை பெருக்கி, காற்றை சுத்தம் செய்து, இயற்கை சமநிலையை பாதுகாக்கின்றன. கூடுதலாக மண் அரிமான தடுப்பு, திட்டமிட்ட வருமானம், உயிர்வகை தன்மை பாதுகாப்பு, சமுதாய மேம்பாடு ஆகியவற்றில் முக்கிய பங்கு வகிக்கிறது. பெரியநாயக்கன்பாளையம் பாலமலை உழவர் உற்பத்தியாளர் நிறுவனம், ஈஷா அவுட்ரீச் ஆகியவற்றுடன் இணைந்து மேட்டுப்பாளையம் அறம் உயிர்ம உழவர் உற்பத்தியாளர், வெள்ளமடை சங்கமம் உழவர் உற்பத்தியாளர், சூலூர் சென்னியாண்டவர் உழவர் உற்பத்தியாளர், காரமடை ரங்கநாதர் உழவர் உற்பத்தியாளர், எஸ்.எஸ். குளம் மகாகாலேஸ்வரர் உழவர் உற்பத்தியாளர், சுல்தான்பேட்டை தென்சேரி மலை உழவர் உற்பத்தியாளர் நிறுவனங்கள் இக்கருத்தரங்கை நடத்தின. கருத்தரங்கில், 50 விவசாயிகள், வெவ்வேறு உழவர் உற்பத்தியாளர் நிறுவனத்தினர் கலந்து கொண்டனர். தோட்டக்கலை துறை, வேளாண் வணிகத்துறை, வனக்கல்லூரி, தமிழ்நாடு காகித மற்றும் செய்தித்தாள் நிறுவன உயர் அதிகாரிகள் பயிற்சி வகுப்பை நடத்தினர். தொடர்ந்து, திருப்பூர் மாவட்டத்தில் நேரடி பயிற்சி பெற, விவசாயிகள் அழைத்துச் செல்லப்பட்டனர்.