வேப்பூரில் 3 இடங்களில் திருட முயற்சி

வேப்பூர்: வேப்பூரில் 3 இடங்களில் பூட்டை உடைத்து திருட முயன்ற சம்பவம் பரபரப்பை ஏற்படுத்தியுள்ளது.வேப்பூர் அடுத்த என்.நாரையூரைச் சேர்ந்தவர் கலியமூர்த்தி. இவர், வேப்பூரில் வீடு கட்டி வாடகைக்கு விட்டுள்ளார். அதில் 2 வீடுகளில் பெண்ணாடம் அடுத்த பெலாந்துறையைச் சேர்ந்த பழனிவேல், 58, கள்ளக்குறிச்சி மாவட்டம், வேங்கைவாடியைச் சேர்ந்த சக்திவேல், 49, தங்கி வேலைக்கு செல்கின்றனர். நேற்று முன்தினம் விடுமுறை காரணமாக 2 பேரும் வீட்டை பூட்டிவிட்டு , தங்களின் சொந்த ஊருக்கு சென்றனர்.நள்ளிரவில் மர்மநபர்கள், 2 வீட்டின் பூட்டை உடைத்து வீட்டிற்குள் சென்றனர். வீட்டில் பணம், நகை இல்லாததால், ஏமாற்றத்துடன் திரும்பி சென்றனர். அதேபோல், வேப்பூர் கூட்டுரோட்டில் கார்த்திக் என்பவரின் அரிசி மண்டி பூட்டை உடைத்து திருட முயன்றனர்.சம்பவ இடங்களை பார்வையிட்ட வேப்பூர் போலீசார், மர்ம நபர்களை தேடிவருகின்றனர்.