மா.கம்யூ., ஆர்ப்பாட்டம்

திருக்கோவிலுார் : வீரபாண்டியில் சுற்று வட்டார மக்களின் அடிப்படை வசதிகளை நிறைவேற்றக் கோரி மா.கம்யூ., சார்பில் ஆர்ப்பாட்டம் நடந்தது.தமிழ்நாடு கரும்பு விவசாயிகள் சங்க மாநிலத் தலைவர் வேல்மாறன் தலைமை தாங்கினார். வட்ட செயலாளர் கணபதி, வட்டக்குழு உறுப்பினர் ராமமூர்த்தி, மாவட்ட குழு உறுப்பினர் உமா மகேஸ்வரி முன்னிலை வகித்தனர்.ஆர்ப்பாட்டத்தில், வீரபாண்டியில் அரசு வங்கிக் கிளையை துவங்க வேண்டும். தேசிய ஊரக வேலை உறுதியளிப்பு திட்டத்தில் கூலியை நிலுவை இன்றி வழங்க வேண்டும். வீரபாண்டி - கண்டாச்சிபுரம் சாலையை அகலப்படுத்த வேண்டும். ஆரம்ப சுகாதார நிலையத்தை மேம்படுத்த வேண்டும் என்பது உட்பட பல்வேறு கோரிக்கைகள் வலியுறுத்தப்பட்டன. வட்டக் குழு உறுப்பினர் ஏழுமலை நன்றி கூறினார்.