உங்களுடன் ஸ்டாலின் திட்ட முகாமில் 810 மனுக்கள் ஏற்பு

வாலாஜாபாத்:நாயக்கன்பேட்டையில் நடைபெற்ற, 'உங்களுடன் ஸ்டாலின்' திட்ட முகாமில் 810 கோரிக்கை மனுக்கள் பெறப்பட்டன. உத்திரமேரூர் தி.மு.க., - எம்.எல்.ஏ., சுந்தர் பங்கேற்று பொது மக்களிடம் கோரிக்கை மனுக்கள் பெற்று முகாமினை துவக்கி வைத்தார். வாலாஜாபாத் ஒன்றியக் குழு தலைவர் தேவேந்திரன், துணை தலைவர் சேகர் மற்றும் அந்தந்த பகுதி ஊராட்சி தலைவர்கள் பங்கேற்றனர். ஜாதி சான்று, பட்டா மாற்றம், விதவை மற்றும் முதியோர் உதவித்தொகை, மகளிர் உரிமைத்தொகை, மருத்துவ காப்பீடு அட்டை, ஆதார் மற்றும் ரேஷன் அட்டை திருத்தம் உள்ளிட்ட 15 துறை சார்ந்த 45 சேவைகளுக்கான 810 கோரிக்கை மனுக்கள் அளித்தனர். அதில், 12 மனுக்கள் மீது உடனடி தீர்வு காணப்பட்டது.