பொன்னியம்மன், செல்லியம்மன் கோவில்களில் தேரோட்டம்

உத்திரமேரூர்:உத்திரமேரூர் அடுத்த, கிளக்காடி பொன்னியம்மன், எஸ்.மாம்பாக்கம் செல்லியம்மன் கோவில்களில் நேற்று முன்தினம் இரவு தேரோட்டம் நடந்தது. உத்திரமேரூர் ஒன்றியம், கிளக்காடி பொன்னியம்மன் கோவிலில், இந்தாண்டிற்கான ஆவணி தேர் திருவிழா நேற்று முன்தினம் இரவு நடந்தது. முன்னதாக, காலை 9:00 மணிக்கு அம்மனுக்கு நெய், பால், இளநீர், சந்தனம் ஆகியவற்றால் சிறப்பு அபிஷேகம் செய்யப்பட்டது. காலை 10:00 மணிக்கு பக்தர்கள் விரதமிருந்து, ஊரணி பொங்கல் வைத்து, அம்மனுக்கு படையலிட்டனர். மாலை 4:00 மணிக்கு கிராமத்தினர் பெருமாள் கோவிலில் இருந்து, சீர்வரிசை கொண்டு வந்து அம்மனுக்கு வைத்தனர். பின், இரவு 11:00 மணிக்கு அலங்கரிக்கப்பட்ட தேரில் பொன்னியம்மன் எழுந்தருளி வீதியுலா வந்தார். அதேபோல, எஸ்.மாம்பாக்கம் கிராமத்தில் உள்ள செல்லியம்மன் கோவிலிலும், நேற்று முன்தினம் இரவு தேரோட்டம் நடந்தது. தேரில் எழுந்தருளிய செல்லியம்மன், கிராம வீதிகளில் உலா வந்து பக்தர்களுக்கு அருள்பாலித்தார்.