வாலாஜாபாத் அருகே வட மாநில பெண் கொலை கழுத்து அறுத்த நிலையில் சடலத்தை மீட்டு விசாரணை

வாலாஜாபாத்: வாலாஜாபாத் அடுத்த, ஊத்துக்காடில் கழுத்து அறுத்த நிலையில் சடலமாக கிடந்த வட மாநில பெண்ணின் சடலத்தை மீட்டு போலீசார் விசாரிக்கின்றனர். வாலாஜாபாத் ஒன்றியம், ஊத்துக்காடு பெருமாள் கோவில் மற்றும் எல்லையம்மன் கோவில் மத்தியில் பொதுக்குளம் உள்ளது. இந்த குளத்தின் கரை மீது கழுத்து அறுக்கப்பட்ட நிலையில் பெண் ஒருவர் சடலமாக கிடப்பதை நேற்று காலை அப்பகுதி மக்கள் கண்டனர். தகவல் அறிந்த வாலாஜாபாத் போலீசார் சம்பவ இடத்திற்கு வந்து அப்பெண்ணின் சடலத்தை மீட்டு பிரேத பரிசோதனைக்காக காஞ்சிபுரம் அரசு பொது மருத்துவமனைக்கு அனுப்பி வைத்து அவர் யார் என்பது குறித்து விசாரணை மேற்கொண்டனர். விசாரணையில், அந்த பெண் சத்தீஸ்கர் மாநிலத்தைச் சேர்ந்த யசோதா, 38, என்பது தெரியவந்தது. இவர், ஊத்துக்காடு குழவர் வீதியில் வாடகை வீடு ஒன்றில் இரண்டு ஆண்களோடு, தங்கி அதே பகுதியில் கட்டட பணிகள் மேற்கொண்டு வந்துள்ளார். யசோதாவுடன் தங்கி இருந்த இரண்டு நபர்கள் மாயமாகி உள்ளதால் அவர்களை போலீசார் தொடர்ந்து தேடி வருகின்றனர். அந்த இருவரை கண்டறிந்த பின்தான் யசோதா இறப்பு குறித்தான முழு காரணங்கள் தெரியவரும் என போலீசார் தெரிவித்தனர்.