மினி லாரி கவிழ்ந்து விபத்து: சிகிச்சையில் இருந்தவர் சாவு

போச்சம்பள்ளி, பர்கூர், ஊத்தங்கரை சட்டசபை தொகுதிகளில் கடந்த, 12-ல், அ.தி.மு.க., பொதுச்செயலாளர் இ.பி.எஸ்., 'மக்களை காப்போம், தமிழகத்தை மீட்போம்' என்ற சுற்றுப்பயண நிகழ்ச்சியை மேற்கொண்டார். அப்போது பர்கூரில் நடந்த நிகழ்ச்சியை பார்க்க, போச்சம்பள்ளி அடுத்த, கீழ்மைலம்பட்டியை சேர்ந்த, 60க்கும் மேற்பட்டோர் ஈச்சர் மினி லாரியில் சென்றனர். நிகழ்ச்சியை பார்த்து விட்டு, அன்றிரவு மீண்டும் தங்களது கிராமத்திற்கு திரும்பினர். அப்போது, 8:30 மணியளவில் மத்துார் அடுத்த, அத்திகானுார் அருகே, காவேரிப்பட்டணம்- திருப்பத்துார் சாலையில், எதிரே வந்த பிக்கப் வேன் மோதியதில், மின் லாரி சாலையோரம் கவிழ்ந்தது. இதில் 35க்கும் மேற்பட்டோர் பலத்த காயமடைந்தனர். அதில் தங்கராஜ், 62, என்பர் ஓசூர் தனியார் மருத்துவமனையில் சிகிச்சை பெற்று வந்த நிலையில், நேற்று காலை உயிரிழந்தார். மத்துார் போலீசார் விசாரிக்கின்றனர்.