த.வெ.க., மாநில மாநாட்டில் 100 அடி கம்பம் சாய்ந்தது

மதுரை:மதுரை பாரபத்தியில் த.வெ.க., இரண்டாவது மாநில மாநாடு இன்று மதியம் 3:00 மணி முதல், இரவு 7:00 மணி வரை நடக்கிறது. முதல் நிகழ்வாக, 100 அடி உயர கொடிக்கம்பத்தில் கட்சித் தலைவர் விஜய் கொடியேற்ற திட்டமிட்டிருந்த நிலையில், நேற்று மதியம் 3:00 மணிக்கு கொடிக்கம்பம் நிறுவும் போது, கம்பம் சரிந்தது. இதில், நுாறடி துாரத்தில் நிறுத்தப்பட்டிருந்த ராமநாதபுரத்தைச் சேர்ந்த த.வெ.க., நிர்வாகி ஒருவரின் காரின் மேற்பகுதி இரண்டாக பிளந்தது. அதிர்ஷ்டவசமாக உயிர் சேதம் ஏற்படவில்லை. ஸ்ரீவில்லிபுத்துார்: தமிழக வெற்றிக் கழக மாநாட்டிற்கு, 'பிளக்ஸ் போர்டு' வைத்தபோது மின்சாரம் பாய்ந்ததில், கல்லுாரி மாணவர் பலியானார். விருதுநகர் மாவட்டம், ஸ்ரீவில்லிபுத்துார் இனாம் கரிசல் குளத்தைச் சேர்ந்த காளியப்பன் மகன் காளீஸ்வரன், 19; பி.எஸ்சி., விஸ்காம் மூன்றாம் ஆண்டு படித்தார். மதுரையில் இன்று நடக்கும் தமிழக வெற்றிக் கழக மாநாட்டிற்காக, நேற்று முன்தினம் இரவு 9:50 மணிக்கு, காமராஜர் நகரில் பிளக்ஸ் வைக்க இரும்பு குழாயை எடுத்தார். அப்போது, டிரான்ஸ்பார்மரில் இருந்து செல்லும் மின் கம்பியில் பட்டு, மின்சாரம் பாய்ந்து விழுந்தார். ஸ்ரீவில்லிபுத்துார் அரசு மருத்துவமனையில் பரிசோதித்த டாக்டர்கள், காளீஸ்வரன் உயிரிழந்து விட்டதாக தெரிவித்தனர். வன்னியம்பட்டி போலீசார் விசாரித்தனர்.