தானம் பெற்ற உடலை வாங்க முதலில் மறுத்து பின்பு பெற்றுக் கொண்ட மதுரை மருத்துவக் கல்லூரி

மதுரை: மதுரை அரசு மருத்துவக் கல்லூரியில், ஓட்டு எண்ணிக்கையை காரணம் காட்டி தானமாக பெற்ற உடலை வாங்க மறுத்து பிரச்னையான பின்னர் ஏற்றுக் கொண்ட நிகழ்வு அரங்கேறி உள்ளது.மதுரை அரசு மருத்துவக் கல்லூரிக்கு உடல் தானம் செய்த மதுரையைச் சேர்ந்த ஓய்வு பெற்ற விமானப்படை வீரர் வேலுச்சாமி, 82 நேற்று (மே28) இறந்தார். அவரது உடலை மகன் சுவாமிநாதன் கல்லூரிக்கு இன்று தானமாக தர வந்த போது தேர்தல் நடத்தை விதிகளை காரணம் காட்டி உடனே வாங்க மறுத்து அரசு மருத்துவமனை மார்ச்சுவரிக்கு அனுப்பினர். இது குறித்து அவரது மகன் சுவாமிநாதன் கூறுகையில், உடலை பதப்படுத்தி (எம்பாமிங்) பாதுகாத்து தேர்தல் முடிவுகள் முடிந்தபின் ஜூன் 6ஆம் தேதி கல்லூரிக்கு எடுத்துச் செல்லப்படும் என்கின்றனர். மார்ச்சுவரியில் மற்ற உடல்களுடன் தானமாக தந்த தந்தை உடலையும் சேர்த்து வைப்பது வேதனை அளிக்கிறது என்றார். இது குறித்து கலெக்டர் சங்கீதாவிடம் பேசுவதற்காக டாக்டர்கள் சென்றனர். உடலை அனாடமி துறையில் வைப்பதற்கு நிலைய மருத்துவ அலுவலர் சரவணன், துறைத் தலைவர் பார்த்திபன் ஆகியோர் கலெக்டர் சங்கீதாவிடம் அனுமதி கோரினர். சங்கீதா அனுமதியின் பேரில் உடற்கூறாய்வு துறையில் இன்று மாலை 5:00 மணிக்கு உடல் தானமாக ஒப்படைக்கப்பட்டது.