ரூ.7.82 லட்சத்திற்கு கொப்பரை விற்பனை

மல்லசமுத்திரம், திருச்செங்கோடு வேளாண்மை உற்பத்தியாளர்கள் கூட்டுறவு விற்பனை சங்கத்தின், மல்லசமுத்திரம் கிளையில் வாரந்தோறும் வெள்ளிக்கிழமை கொப்பரை தேங்காய் ஏலம் நடக்கிறது. அதன்படி, நேற்று நடந்த ஏலத்தில் மங்களம், மாமுண்டி, காளிப்பட்டி, அம்மாபட்டி, பள்ளக்குழி அக்ரஹாரம், மேல்முகம், மாமரத்துப்பட்டி, ராமாபுரம், பருத்திப்பள்ளி, கருங்கல்பட்டி, வையப்பமலை, மொரங்கம், ஆத்துமேடு உள்ளிட்ட பகுதிகளை சேர்ந்த விவசாயிகள், 60 கிலோ எடை கொண்ட, 94 மூட்டை கொப்பரை தேங்காயை விற்பனைக்கு கொண்டு வந்திருந்தனர்.இதில், முதல் தரம் கிலோ, 205.75 ரூபாய் முதல், 233.70 ரூபாய்; இரண்டாம் தரம், 145.75 ரூபாய் முதல், 180.50 ரூபாய் என, மொத்தம், 7.82 லட்சம் ரூபாய்க்கு கொப்பரை ஏலம் நடந்தது. அடுத்த ஏலம் வரும், 25-ல் நடக்கிறது.