குன்னுார் தேயிலை ஏலத்தில் ரூ.25.24 கோடி மொத்த வருமானம் சராசரி விலையில் உயர்வு

குன்னுார்; குன்னுாரில் நடந்த தேயிலை ஏலங்களில், 25.24 கோடி ரூபாய் மொத்த வருமானம் கிடைத்தது.நீலகிரி மாவட்டம், குன்னுார் ஏல மையத்தில், 50வது ஏலம் நடந்தது.ஏலத்தில், 20.70 லட்சம் கிலோ தேயிலை துாள் ஏலத்திற்கு வந்ததில், 18.62 லட்சம் கிலோ விற்பனையானது. ஒரு லட்சம் கிலோ விற்பனையும் சரிந்தது. 89.93 சதவீதம் விற்றது. சராசரி விலை கிலோவிற்கு, 126.54 ரூபாய் என இருந்தது; மொத்த வருமானம், 23.56 கோடி ரூபாய் கிடைத்தது. கடந்த வாரத்தை விட, 40 லட்சம் ரூபாய் சரிந்தது.'டீசர்வ்' ஏலம்: நீலகிரியில் கூட்டுறவு தொழிற்சாலைகளில் உற்பத்தி செய்யப்படும் தேயிலை துாள் 'டீசர்வ்' மையத்தில் ஏலம் விடப்படுகிறது. இதற்கான ஏலத்தில், 1.43 லட்சம் கிலோ வரத்து இருந்த நிலையில், 100 சதவீதம் விற்றது. சராசரி விலை, 117.40 ரூபாய் என இருந்தது. 1.68 கோடி ரூபாய் மொத்த வருமானம் கிடைத்தது. சராசரி விலையில் கிலோவுக்கு, 8 ரூபாய் ஏற்றம் கண்டது. கடந்த வாரத்தை விட, 10 ஆயிரம் கிலோ வரத்து குறைந்தது. இந்த இரு ஏலங்களிலும் சேர்த்து, 25.24 கோடி ரூபாய் மொத்த வருமானம் கிடைத்தது. கடந்த ஏலத்தை விட வரத்தும், விற்பனையில் சரிவு ஏற்பட்ட போதும், ஏலத்தில், சராசரி விலை உயர்ந்ததுடன் வருமானம் அதிகரித்தது.