டூ - வீலர்கள் மீது கார் மோதல் அக்கா, தம்பி பரிதாப பலி

தாரமங்கலம்: சேலம், அன்னதானப்பட்டியை சேர்ந்தவர் சேட்டு, 56. இவரது அக்கா மல்லிகா, 60, உறவினர் பானுமதி, 62. இவர்கள் மூவரும் சேலத்தில் இருந்து, 'டி.வி.எஸ்., - எக்ஸ்.எல்., ஹெவி டூட்டி' மொபட்டில், தாரமங்கலம் அருகே கே.ஆர்.தோப்பூரில் உள்ள குலதெய்வம் கோவிலுக்கு நேற்று வந்து கொண்டிருந்தனர். மதியம், 12:45 மணிக்கு அழகுசமுத்திரம் அருகே, படையப்பா நகர் பகுதியில் மொபட்டில் வந்து கொண்டிருந்தனர்.எதிரே, சேலம் சித்தனுாரை சேர்ந்த ஜவஹர், 49, என்பவர் ஓட்டி வந்த பி.எம்.டபிள்யூ., கார், மொபட் மீது மோதியது. இதில், துாக்கி வீசப்பட்டு, சம்பவ இடத்திலேயே சேட்டு, மல்லிகா இறந்தனர். பானுமதி பலத்த காயமடைந்தார். மொபட் மீது மோதிய கார் நிற்காமல் சென்ற போது, கந்தசாமி, 57, என்பவர் ஓட்டி வந்த, 'ஆக்டிவா' மொபட் மீது, கார் மோதி நின்றது. காயமடைந்த கந்தசாமியை மீட்டு, மருத்துவமனைக்கு கொண்டு சென்றனர். அங்கிருந்தோர், ஜவஹரை பிடித்து, தாரமங்கலம் போலீசுக்கு தகவல் அளித்தனர். போலீசார், அவரிடம் விசாரிக்கின்றனர்.