கவுன்சிலர்கள் கோரிக்கைக்கு நடவடிக்கை வேண்டும்

தேவகோட்டை; தேவகோட்டை நகராட்சி கூட்டம் தலைவர் சுந்தரலிங்கம் தலைமையில் நடந்தது. கமிஷனர் கண்ணன் முன்னிலை வகித்தார்.நடந்த விவாதம்: அய்யப்பன்: புதிய பஸ் ஸ்டாண்ட் கட்டும்போது மார்க்கெட் வியாபாரிகளுக்கு ஏதாவது ஏற்பாடு செய்துகொடுக்க வேண்டும்.எனது வார்டில் உப்பு தண்ணீர் வருவதால் பயன்படுத்த முடியவில்லை.வடிவேல் முருகன்: மார்க்கெட்டை மாற்றினால் வியாபாரிகள் மட்டுமின்றி அந்த பகுதியை சுற்றி அனைத்து வியாபாரமும் பாதிக்கும். தலைவர்: பஸ் ஸ்டாண்ட் கடைக்காரர்கள் கடைகளை காலி செய்வதாக சொல்லி விட்டனர். அவர்களில் 18 ஆண்டு கடை நடத்தியவர்களுக்கு சட்டப்படி முன்னுரிமை தரப்படும். தினசரி மார்க்கெட் வியாபாரிகளிடமும் பேசுவோம். புது பஸ் ஸ்டாண்ட் வரைபடம் மாநில தலைமை பொறியாளர் அனுமதி பெற்றாகி விட்டது.வேலுச்சாமி: எம்.எம். நகரில் இரண்டு ஆண்டுகளாக குடிநீர் பிரச்னை உள்ளது. பல முறை அதிகாரிகளிடம் சொல்லிவிட்டேன். தீர்வு இல்லை. சொந்த செலவில் குழாய் அமைத்து குடிநீர் இணைப்பு கொடுத்துள்ளேன். இரண்டு ஆழ்துளை கிணறு அமைக்க வேண்டும்.அகிலா குமாரி: துப்புரவு பணியாளர் குடியிருப்பில் கழிப்பறை கட்டி திறக்கவில்லை. அனிதா : இரவுசேரி பாதையில் சாக்கடை ஓடுகிறது. கூட்டத்தில் தெரிவித்து நடவடிக்கை இல்லையெனில் கூட்டம் ஏன் நடத்த வேண்டும்.ரமேஷ், து.த.: புதிய எல்.இ.டி பல்ப் போட அனுமதிக்கு எழுதி இருந்தீர்கள். என்னாச்சு. பல இடங்கள் இருட்டாக இருக்கிறது. பொது நிதியில் வாங்கியாவது போட வேண்டும்.தலைவர்: கூட்டத்தில் பேசுவதை அதிகாரிகள்இரண்டு நாளில் சரி செய்ய வேண்டும். திரும்ப திரும்ப கூறுவது சங்கடமாக உள்ளது. குடிநீரை பொறுத்தவரை ஒரு நாள் பாதிப்பு என்றாலும் மக்களுக்கு பதில் சொல்ல முடியாது. குடிநீர் பிரச்னைக்கு உடனுக்குடன் தீர்வு காண வேண்டும்.