புட்லுார் - அரண்வாயல் சாலையில் ரூ.3.75 கோடியில் சீரமைப்பு பணி

திருவள்ளூர்:புட்லுார் - அரண்வாயல் சாலையில், 3.75 கோடி ரூபாய் மதிப்பில் சீரமைப்பு பணி பூமி பூஜையுடன் துவங்கியது.பூந்தமல்லி - திருவள்ளூர் சாலையில், அரண்வாயல் கிராமம் உள்ளது. இங்கிருந்து, புட்லுார் வழியாக, திருவள்ளூர் - -ஆவடி சாலையை இணைக்கும் வகையில், 6 கி.மீ., துாரத்தில் சாலை அமைந்துள்ளது. இச்சாலை வழியாக, தினமும், நுாற்றுக்கும் மேற்பட்ட வாகனங்கள் சென்று வருகின்றன.புட்லுார் ரயில் நிலையம், அங்காள பரமேஸ்வரி அம்மன் கோவில், காக்களூர் தொழிற்பேட்டைக்கு, பக்தர்கள், தொழிலாளர்கள் என, 1,000க்கும் மேற்பட்டோர் வந்து செல்கின்றனர்.அரண்வாயலில் இருந்து, புட்லுார் வரை, 4 கி.மீ., துாரம் சாலையில் தார் பெயர்ந்து, குண்டும் குழியுமாக காட்சியளிக்கிறது. இதன் காரணமாக, இச்சாலையில் செல்லும் வாகன ஓட்டிகள், கடும் அவதிப்பட்டு வருகின்றனர். இச்சாலையை சீரமைக்கக்கோரி பகுதிவாசிகள் வேண்டுகோள் விடுத்தனர்.இதையடுத்து, புட்லுார் மேம்பாலத்தில் இருந்து, அரண்வாயல் மேம்பாலம் வரை 4 கி.மீ., துாரம் வரை, 3.75 கோடி ரூபாய் நெடுஞ்சாலைத் துறை நிதி ஒதுக்கீடு செய்தது. சாலை சீரமைப்பு பணியினை, பூந்தமல்லி தொகுதி தி.மு.க., - எம்.எல்.ஏ., கிருஷ்ணசாமி நேற்று, சாலை சீரமைப்பு பணியை, பூமி பூஜையுடன் துவக்கி வைத்தார்.