கல்வி உதவித்தொகை விண்ணப்பிக்க அழைப்பு

விழுப்புரம் : விழுப்புரம் மாவட்டத்தில் பிரதமரின் கல்வி உதவித்தொகை திட்டத்திற்கு மாணவர்கள் உதவித்தொகை பெற விண்ணப்பிக்கலாம் என கலெக்டர் ஷேக் அப்துல் ரஹ்மான் தெரிவித்துள்ளார். அவர் விடுத்த செய்திக்குறிப்பு: நாடு முழுவதும் இதர பிற்படுத்தப்பட்டோர், பொருளாதாரத்தில் பின் தங்கியவர்கள், சீர்மரபினர் ஆகிய பிரிவுகளை சேர்ந்த மாணவர்களுக்கு கல்வி உதவித்தொகை வழங்கும் வகையில், பிரதமரின் கல்வி உதவித்தொகை திட்டம் மத்திய அரசால் செயல்படுத்தப்படுகிறது. அதில், 2025-26ம் ஆண்டிற்கு தேசிய கல்வி உதவித்தொகைக்கு விண்ணப்பிக்க, பட்டியிலிடப்பட்ட பள்ளிகளில் பயிலும் தமிழகத்தை சார்ந்த மாணவர்களுக்கு இக்கல்வி உதவித்தொகை வழங்கப்பட உள்ளது. இத்திட்டத்திற்கான பெற்றோர் ஆண்டு வருமானம் ரூ. 2.50 லட்சம். இதற்கு மாணவர்கள் விண்ணப்பிப்பதற்கு கால அவகாசம் வரும், 15ம் தேதி வரை நீட்டிக்கப்பட்டுள்ளது. கல்வி நிறுவனங்கள் விண்ணப்பத்தினை சரிபார்க்க கால அவகாசம் வரும், 31ம் தேதி வரை நீட்டிக்கப்பட்டுள்ளது. இத்திட்டத்தின் கீழ் கடந்த நிதியாண்டில் பயனடைந்த மாணவ, மாணவிகள் தேசிய கல்வி உதவித்தொகை இணையதளத்தில் (scholarships.gov.in) பதிவு செய்து, 2025-26ம் ஆண்டிற்கான விண்ணப்பித்தினை புதுப்பிக்கலாம். இவ்வாறு அவர் தெரிவித்துள்ளார்.