நாட்டின் உணவு பணவீக்கம் 8.31% ஆக உயர்வு

புதுடில்லி : நாட்டின் உணவு பணவீக்கம் 8.31 சதவீதமாக அதிகரித்துள்ளது. ஜூலை 02ம் தேதியுடன் முடிவடைந்த வாரத்திற்கான உணவு பணவீக்கம் இன்று வெளியிடப்பட்டுள்ளது. இதில் பணவீக்கம் விகிதம் கடந்த வாரத்தை விட 0.70 சதவீதம் அதிகரித்துள்ளது. கடந்த வாரத்தில் உணவு பணவீக்கம் 7.61 சதவீதமாக இருந்தது குறிப்பிடத்தக்கது. கடந்த 2 வாரங்களாக சரிந்து வந்த உணவு பணவீக்கம், உணவு பொருட்களின் விலை அதிகரித்ததை அடுத்து இந்த வாரம் மீண்டும் அதிகரிக்கத் துவங்கி உள்ளது. மத்திய அரசு இன்று வெளியிட்டுள்ள உணவு பணவீக்க குறிப்பின்படி பழங்களின் விலை 13.54 சதவீதமும், பால் விலை 12.39 சதவீதமும் அதிகரித்துள்ளது. முட்டை, இறைச்சி, மீன் ஆகியவற்றின் விலை 11.95 சதவீதம் அதிகரித்துள்ளது. பருப்புக்களின் விலை 5.40 சதவீதமும், காய்கறிகளின் விலை 2.25 சதவீதமும் உயர்ந்துள்ளது. குறிப்பாக வெங்காயத்தின் விலை 30.72 சதவீதம் உயர்ந்துள்ளது. அதே சமயம் தானியங்கள் மற்றும் உருளைக்கிழங்கின் விலை குறைந்துள்ளது.