ஓய்வூதியர்களுக்கு அகவிலைப்படி: மாதம் ரூ.73.42 கோடி தேவை

சென்னை: 'போக்குவரத்துக் கழக ஓய்வூதியர்களுக்கு அகவிலைப்படி உயர்வு வழங்கினால், மாதம்தோறும் 73.42 கோடி ரூபாய் கூடுதலாக தேவைப்படும்' என, தமிழக போக்குவரத்து துறை கணக்கீடு செய்துள்ளது.அரசு போக்குவரத்துக் கழகங்களில் பணியாற்றி, ஓய்வு பெற்றவர்களுக்கு, கடந்த ஒன்பது ஆண்டுகளாக அகவிலைப்படி உயர்வு வழங்கப்படவில்லை. இந்த தொகையை வழங்கக் கோரி, ஓய்வூதியர்களின் சங்கங்கள், பல்வேறு கட்ட போராட்டங்களை நடத்தி வருகின்றன. தற்போதுள்ள ஊழியர்களும், ஓய்வூதியர்களின் கோரிக்கைகளை ஆதரித்து போராட்டம் நடத்தி வருகின்றனர். இந்நிலையில், ஓய்வூதியர்களுக்கு வழங்க வேண்டிய, அகவிலைப்படி உயர்வு எவ்வளவு; மாதந்தோறும் வழங்கினால், எவ்வளவு கூடுதல் செலவாகும் என, போக்குவரத்து துறை கணக்கீடு செய்துள்ளது. இது குறித்து, போக்குவரத்து துறை அதிகாரிகள் கூறியதாவது: நிதி பற்றாக்குறை உள்ளிட்ட காரணங்களால், போக்குவரத்துக் கழக ஓய்வூதியர்களுக்கு, கடந்த 2015 நவம்பர் முதல் அகவிலைப்படி உயர்வு வழங்கவில்லை. நீதிமன்றத்தில் உள்ள பல்வேறு வழக்குகளில், அகவிலைப்படி உயர்வு வழங்க உத்தரவிடப்பட்டுள்ளது. இதன் தொடர்ச்சியாக, அகவிலைப்படி உயர்வு வழங்க, எவ்வளவு தொகை தேவைப்படும் என மதிப்பிடப்பட்டது.அதன்படி, நடப்பாண்டு அக்., மாதம் வரையிலான காலத்தில், அகவிலைப்படி உயர்வு வழங்க, 3,028.75 கோடி ரூபாய் தேவைப்படுகிறது. மேலும், மாதம்தோறும் அகவிலைப்படி உயர்வு அளிக்க வேண்டுமானால், கூடுதலாக மாதம்தோறும் 73.42 கோடி ரூபாய் தேவைப்படுகிறது. இதை வழங்குவது குறித்து தமிழக அரசு முடிவு செய்யும். இவ்வாறு அவர்கள் கூறினர்.