விரைந்தது பேரிடர் மீட்பு குழு

ராணிப்பேட்டை மாவட்டம், அரக்கோணம் அடுத்த தக்கோலத்தில் தேசிய பேரிடர் மீட்புப் படை மையம் செயல்பட்டு வருகிறது. இங்கு பயிற்சி பெற்ற வீரர்கள், நாடு முழுதும் புயல், பெருமழை, கட்டட இடிபாடுகள் போன்ற பேரிடர்களில் சிக்கும் மக்களை மீட்கும் பணியில் ஈடுபடுகின்றனர். இந்நிலையில், வங்கக்கடலில் உருவாகியுள்ள டிட்வா புயல் காரணமாக, தமிழகத்தின் பல்வேறு பகுதிகளில் இன்றும், நாளையும் மிக கனமழை பெய்யக்கூடும் என, இந்திய வானிலை ஆய்வு மையம் எச்சரிக்கை விடுத்துள்ளது. எனவே, தமிழகம் மற்றும் புதுச்சேரி மாநில பேரிடர் மேலாண்மை ஆணையம் கேட்டுக் கொண்டபடி, புதுச்சேரிக்கு 60 வீரர்கள் அடங்கிய இரு பேரிடர் மீட்புக் குழுக்களும், தஞ்சாவூர், நாகப்பட்டினம், மயிலாடுதுறை, புதுக்கோட்டை, கடலுார், திருவாரூர் ஆகிய ஆறு மாவட்டங்களுக்கு தலா, 30 வீரர்கள் அடங்கிய ஆறு குழுவினரும் நேற்று புறப்பட்டு சென்றனர். மேலும், இந்த குழுக்களுடன் நான்கு மோப்ப நாய்களும் அழைத்து செல்லப்பட்டு உள்ளதாக அதிகாரிகள் தெரிவித்தனர்.