மல்யுத்த வீரர் ஹல்க் ஹோகன் மாரடைப்பால் காலமானார்

புளோரிடா:பிரபல மல்யுத்த வீரர் ஹல்க் ஹோகன் 71, அமெரிக்காவில் மாரடைப்பால் காலமானார்.இவர் 90ஸ் கிட்ஸின் மனதில் நீங்கா இடம் பிடித்தவர். மல்யுத்த வீரரின் குடும்பத்தினருக்கும் நண்பர்களுக்கும் பிரபலங்கள் இரங்கலைத் தெரிவித்து வருகின்றனர்.புகழ்பெற்ற அமெரிக்க மல்யுத்த வீரர் ஹல்க் ஹோகன், ஆகஸ்ட் 11, 1953ல் ஜார்ஜியாவின் அகஸ்டாவில் பிறந்தார். தொழில்முறை மல்யுத்த வரலாற்றில் மிகவும் பிரபலமான நபர்களில் ஒருவராக உருவெடுத்தார். அவரது முத்திரையான கைப்பிடி மீசையுடன் கவர்ச்சியாக வலம் வந்தார்.டபுள்யு டபுள்யு எப் போட்டியை பிரபலமாக்கியதில் இவருக்கு முக்கிய இடம் உண்டு. இதனால் பெரிய நட்சத்திரமாக விளங்கினார்.ஹல்க் ஹோகனின் ஆரம்ப மல்யுத்த நாட்கள் 1970களின் பிற்பகுதியில் தொடங்கின, ஆனால் 1983 ஆம் ஆண்டு வின்ஸ் மெக்மஹோனின் உலக மல்யுத்த கூட்டமைப்பில் சேர்ந்தபோது அவரது வாழ்க்கை ஒரு மகத்தான திருப்பத்தை எடுத்தது. ஹோகனின் வீரதீர ஆளுமை, தேசபக்தி விளம்பரங்கள் மற்றும் உடல்கட்டு ஆகியவற்றால் அவரது புகழ் உயர்ந்தது. 'பயிற்சி பெறுங்கள், உங்கள் பிரார்த்தனைகளைச் சொல்லுங்கள், வைட்டமின்களை உண்ணுங்கள், உங்களை நம்புங்கள் என்ற அவரது முழக்கம் ரசிகர்களிடம், குறிப்பாக குழந்தைகளிடம் எதிரொலித்தது.