கொடைக்கானலில் முக்கிய சுற்றுலாத்தலமாக பேரிஜம் ஏரி விளங்கி வருகிறது. பேரிஜம் ஏரி மற்றும் அதை சுற்றி இருக்கும் பகுதியிலும், ஏரிக்கு செல்லும் மலை பாதையிலும் கூத்தாடும் இயற்கை எழில், மனதுக்கு அவ்வளவு புத்துணர்ச்சியை தரக்கூடியது. இந்த பகுதிக்கு செல்ல சுற்றுலா பயணிகள் மத்தியில் டிமாண்ட் அதிகம் இருக்கும். ஆனால், பேரிஜம் ஏரி முழுக்க முழுக்க வனத்துறை கட்டுப்பாட்டில் இருப்பதால், அவர்களின் அனுமதி பெற்று தான் செல்ல முடியும். இதற்கென தனி கட்டணமும் உண்டு. இந்த நிலையில் தான் பேரிஜம் ஏரிக்கு செல்ல வனத்துறை திடீர் தடை விதித்துள்ளது. இன்று முதல் மறு அறிவிப்பு வரும் வரை பேரிஜம் ஏரி மூடப்படுவதாக கொடைக்கானல் வனத்துறை அதிகாரிகள் அறிவிப்பு வெளியிட்டுள்ளனர். பேரஜிம் ஏரி அடர்ந்த காட்டில் இருப்பதால் அங்கு அனைத்து வகை மிருகங்களும் வந்து செல்லும். சுற்றுலாப்பயணிகள் நடமாடும் பகுதியில் இப்போது மிகப்பெரிய காட்டு யானை கூட்டம் இறங்கி இருக்கிறது. யானைகள் தொடர்ந்து அதே பகுதியில் முகாமிட்டு இருப்பதால், சுற்றுலா பயணிகள் நலன் கருதி பேரிஜம் ஏரி மூடப்படுகிறது. யானை கூட்டம் இங்கிருந்து கலைந்து சென்றால், மீண்டும் பேரிஜம் ஏரி செல்ல அனுமதி வழங்கப்படும் என்று வனத்துறை அதிகாரிகள் கூறினர்.