குற்றப் பின்னணியில் திமுகவினர் வீடியோ வெளியிட்ட அண்ணாமலை பாஜ மாநில தலைவர் அண்ணாமலை அறிக்கை; தமிழகத்தில் பெண்களுக்கு எதிரான பாலியல் குற்றங்கள் தொடர்ந்து அதிகரித்து வருகின்றன. குற்றவாளிகள் திமுகவினராக இருப்பதால் உடனுக்குடன் நடவடிக்கை எடுக்காமல் தாமதப்படுத்தி குற்றத்தை மூடி மறைக்க முயல்கிறது திமுக தரப்பு. அண்ணா பல்கலை மாணவி மீதான பாலியல் தாக்குதல் வழக்கிலும், கைது செய்யப்பட்ட திமுக நிர்வாகியுடன் கைப்பேசியில் பேசிய நபர் யார் என்ற உண்மையை முழுதுமாக மறைக்க முயற்சிக்கிறது. இன்னும் ஒரு படி மேல் சென்று பாதிக்கப்பட்ட மாணவியை, பொதுவெளியில் அவமானப்படுத்தி, மாணவி குறித்த தனிப்பட்ட விவரங்களை கசிய விட்டு, இனி யாரும் குற்றவாளிகள் மீது புகார் கொடுக்க அச்சப்படும் அளவிற்கு மறைமுகமாக மிரட்டியும் தரம் தாழ்ந்தும் சென்று கொண்டிருக்கிறது திமுக அரசு. திமுக அரசின் இந்த பெண்கள் விரோத செயல்களை கண்டித்தும், அண்ணா பல்கலை மாணவி வழக்கில் முழு உண்மையும் வெளிக்கொண்டு வந்து நடவடிக்கை எடுக்க வலியுறுத்தியும், பாஜ மகளிர் அணி சார்பில் நாளை மதுரையில் தொடங்கி சென்னை வரை நீதி கேட்பு பேரணி நடக்க உள்ளது.