33வது ஒலிம்பிக் தொடர் பிரான்ஸ் தலைநகர் பாரீசில் நடந்து வருகிறது. இந்த தொடரில் நேற்று இரவு ஆண்களுக்கான 57 கிலோ எடை பிரிவு மல்யுத்த போட்டி நடந்தது. வெண்கலப்பதக்கத்துக்கான ஆட்டத்தில் இந்தியாவின் அமன் ஷெராவத், பியூர்டோரிகோவின் டேரியன் கிரஸ் உடன் மோதினார். ஆரம்பம் முதலே அபாரமான ஆட்டத்தை வெளிப்படுத்திய அமன் 13க்கு 5 என்ற புள்ளிக்கணக்கில் டேரியன் கிரஸை வீழ்த்தி வெண்கலப்பத்தக்கத்தை வசமாக்கினார். அறிமுக ஒலிம்பிக்கிலேயே பதக்கம் வென்று அசத்திய அமனுக்கு பாராட்டுக்கள் குவிந்து வருகிறது. ஹரியானாவை சேர்ந்த இவருக்கு வயது 21. ஆசிய சாம்பியன்ஷிப்பில் தங்கம், ஆசிய விளையாட்டு போட்டிகளில் வெண்கலம், கிராண்ட்ப்ரீ போட்டியில் 2 தங்கம், 2 வெள்ளி, 1 வெண்கலம் வென்றுள்ளார். இது வரை ஈட்டி எறிதலில் நீரஜ் சோப்ரா (வெள்ளி), ஹாக்கி (வெண்கலம்), துப்பாக்கி சுடுதலில் மனுபாகர், ஸ்வப்னில், கலப்பு இரட்டையரில் மனுபாகர்-சரப்ஜோத் சிங் வெண்கலம் கைப்பற்றி உள்ளனர். இதன் மூலம் இந்தியாவின் பதக்க எண்ணிக்கை 6 ஆக உயர்ந்துள்ளது.