12 நாளில் ரூ.540 கோடி வசூலித்த ‛லியோ'

லோகேஷ் கனகராஜ் இயக்கத்தில் விஜய் நடிப்பில் திரைக்கு வந்துள்ள திரைப்படம் ‛லியோ'. விஜய் உடன் திரிஷா, அர்ஜூன், சஞ்சய் தத், கவுதம் மேனன் உள்ளிட்டோர் நடித்தனர். அனிருத் இசையமைத்தார். 7 ஸ்கிரீன் ஸ்டுடியோ சார்பில் லலித் குமார் தயாரித்தார். படம் ரிலீஸிற்கு முன்பிலிருந்து ரிலீஸான பின்பு வசூல் வரை தொடர் சர்ச்சைகளில் சிக்கி வந்தது. படத்திற்கு கலவையான விமர்சனங்கள் கிடைத்தாலும் வசூல் நன்றாக உள்ளது என தயாரிப்பு தரப்பு தெரிவிக்கிறது. ஆனால் அது உண்மையில்லை என சர்ச்சையும் நிலவுகிறது. குறிப்பாக தியேட்டர் உரிமையாளர்களே இந்த படத்தின் வசூலால் தங்களுக்கு லாபம் இல்லை என கூறினர். ஒருவாரத்தில் ரூ.461 கோடி வசூலித்ததாக அறிவித்த தயாரிப்பு தரப்பு தற்போது 12 நாளில் ரூ.540 கோடி வசூலித்துள்ளதாக தெரிவித்துள்ளது. நாளை(நவ., 1) படத்தின் வெற்றி விழா சென்னையில் நடைபெற உள்ளது. அதில் விஜய்யும் கலந்து கொள்ள உள்ளார்.