'ராயன்' படத்திற்கு 'ஏ' சான்றிதழ்

தனுஷ் இயக்கம், நடிப்பில் ஜூலை 26ம் தேதி தமிழ், தெலுங்கு, ஹிந்தி ஆகிய மொழிகளில் வெளியாக உள்ள படம் 'ராயன்'. இப்படத்திற்கு தணிக்கைக் குழுவினர் 'ஏ' சான்றிதழை வழங்கியுள்ளார்கள். படத்தில் நிறைய வன்முறைக் காட்சிகள் உள்ளதால் இந்த சான்றிதழ் வழங்கப்பட்டுள்ளது.

ஏஆர் ரஹ்மான் இசையமைக்கும் இப்படத்தில் சந்தீப் கிஷன், காளிதாஸ் ஜெயராம், துஷாரா விஜயன், அபர்ணா பாலமுரளி, வரலட்சுமி சரத்குமார், எஸ்ஜே சூர்யா, செல்வராகவன், பிரகாஷ் ராஜ், மற்றும் பலர் நடித்துள்ளனர்.

தனுஷ் நடித்து இதற்கு முன்பு வெளிவந்த 'வட சென்னை' படம்தான் 'ஏ' சான்றிதழ் பெற்று வெளியானது. அதற்குப் பிறகு இப்போது 'ராயன்' படம் அந்த சான்றுடன் வெளியாக உள்ளது.

படத்தில் உள்ள சில வன்முறைக் காட்சிகளை நீக்கிவிட்டு மறு தணிக்கைக்கு விண்ணப்பிக்க தனுஷ் ஆலோசனை சொன்னாராம். ஆனால், படத்தைப் பார்த்த தயாரிப்பாளர் பரவாயில்லை, தியேட்டர்களில் அப்படியே வெளியாகட்டும். டிவியில் ஒளிபரப்பாகும் போது வேண்டுமானால் மறு தணிக்கை செய்து கொள்ளலாம் என்று சொல்லிவிட்டாராம்.