சீதாதேவி சண்டை போட்டதாக வால்மீகி ராமாயணத்தில் கூட இல்லை : விமர்சித்த சக்திமான் நடிகர் முகேஷ் கண்ணா

பி.ஆர்.சோப்ராவின் மகாபாரதம் தொடரில் பீஷ்மராகவும், சக்திமான் கதாபாத்திரத்திலும் நடித்து புகழ்பெற்ற பாலிவுட் மூத்த நடிகர் முகேஷ் கண்ணா, ராமாயணா படத்தில் சீதா தேவியின் சித்தரிப்பைக் கண்டித்து சமீபத்தில் ஒரு நீண்ட வீடியோவைப் பகிர்ந்துள்ளார்.

அதில், சீதா மாதா ஜான்சி ராணியைப் போல சண்டை போடுவதையோ அல்லது தற்கால கதாநாயகிகளைப் போல வீராங்கனையாக மாறுவதையோ உங்களால் கற்பனை செய்ய முடிகிறதா? நான் வால்மீகி ராமாயணத்தைப் படித்திருக்கிறேன். அதில் சீதா தேவி எங்குமே சென்று சண்டை போட்டதாக எழுதப்படவில்லை என்று முகேஷ் கண்ணா தெரிவித்துள்ளார்.

மேலும், 14 ஆண்டுகள் வனவாசத்தின் போது சீதை எந்தப் போரிலும் பங்கேற்கவில்லை. கர-தூஷணர்களுடனான சம்பவத்தைக் குறிப்பிட்ட அவர், ராமன் மட்டுமே அவர்களைத் தோற்கடித்தார் என்றும், சீதையும் லட்சுமணனும் போர்க்களத்தில் இல்லை என்றும் சுட்டிக்காட்டினார். சீதை ஒரு வீராங்கனையாகக் காட்டப்பட்டிருந்தால், ராவணன் அவளைக் கடத்திச் சென்றபோது ஏன் அவளால் அதை எதிர்க்க முடியவில்லை என்றும் அவர் கேள்வி எழுப்பினார். இந்தச் சித்தரிப்பு இதிகாச நிகழ்வுகளுக்கு எதிரானது என்றும், காவியத்தில் சீதை கடத்தப்பட்டு அசோக வனத்திற்கு கொண்டு செல்லப்படுவதாகவும் அவர் கூறினார்.

ராமாயணத்தை அடிப்படையாகக் கொண்டு இந்த காட்சி அமைக்கப்பட்டதாக தயாரிப்பாளர் நமித் மல்ஹோத்ரா அளித்த விளக்கத்திற்கும் கண்ணா பதிலளித்தார். தான் அதிர்ச்சியில் இருப்பதாகக் கூறிய அவர், வால்மீகியின் பதிப்பைக் குறிப்பிட்டு, ராமாயணம் ஒன்றுதான் உள்ளது என்று திட்டவட்டமாகக் கூறினார். மேலும், தயாரிப்பாளர்களிடம் நீங்கள் வெட்கப்பட வேண்டும் என்றும் கூறினார்.

அதோடு, ராமனை விட ராவணனுக்கே அதிக திரை நேரம் கொடுக்கப்பட்டுள்ளதற்கும் அவர் எதிர்ப்பு தெரிவித்தார். மேலும், இதிகாசத்திற்கு உண்மைக்கு மாறாக இருப்பதை விட, படத்தின் ரூ. 4,000 கோடி பட்ஜெட்டை திரும்பப் பெறுவதிலேயே தயாரிப்பாளர்கள் அதிக கவனம் செலுத்துவதாக குற்றம் சாட்டியுள்ளார். ஆதிபுருஷ் படம் சந்தித்த எதிர்ப்பை அவர்களுக்கு நினைவூட்டிய அவர், ஆதி புருஷ் படத்திற்கு என்ன நடந்தது என்பதை ஏற்கனவே பார்த்திருக்கிறீர்கள் என்றார்.

தான் இன்னும் இப்படத்தைப் பார்க்கவில்லை என்பதையும் கண்ணா தெளிவுபடுத்தினார். விளம்பரங்கள் மற்றும் பார்வையாளர்களின் கருத்துக்களின் அடிப்படையிலேயே தனது கருத்துக்கள் அமைந்துள்ளதாக அவர் கூறினார். மேலும், லாபத்தை மட்டுமே குறிக்கோளாகக் கொண்ட திரைப்பட தயாரிப்பாளர்களுக்காக ரூ. 1,200 கொடுத்து டிக்கெட் வாங்க எனக்கு விருப்பமில்லை என்றும் தெரிவித்தார். இப்படத்தைப் பற்றிய அனுபவ் கேரின் நேர்மறையான விமர்சனத்தையும் அவர் வெட்கக்கேடானது என்று விமர்சித்தார்.