11,500 தியேட்டர்களில் 'புஷ்பா 2' ரிலீஸ்

சுகுமார் இயக்கத்தில், அல்லு அர்ஜுன், ராஷ்மிகா மந்தனா, பஹத் பாசில் மற்றும் பலர் நடிப்பில் உருவாகியுள்ள தெலுங்குப் படம் 'புஷ்பா 2'. இப்படம் ஹிந்தி, தமிழ், கன்னடம், மலையாளம், பெங்காலி ஆகிய மொழிகளிலும் டப்பிங் செய்யப்பட்டு வெளியாக உள்ளது.

இந்திய சினிமாவில் இதுவரை இல்லாத அளவிற்கு மிக அதிகமான தியேட்டர்களில் படத்தை வெளியிட உள்ளார்களாம். சுமார் 11,500 தியேட்டர்களில் படத்தை திரையிடுவதற்கான வேலைகள் நடந்து வருவதாகச் சொல்கிறார்கள். இந்தியாவில் 6500 தியேட்டர்கள், வெளிநாடுகளில் 3000 இடங்களில் 5000 தியேட்டர்களில் திரையிட உள்ளதாகத் தகவல் வெளியாகி உள்ளது.

இந்திய சினிமாவில் இதற்கு முன்பு வசூல் சாதனை புரிந்த சில படங்களின் வசூலை 'புஷ்பா 2' படம் முறியடிக்கும் என தெலுங்குத் திரையுலகினர் நம்புகிறார்கள். விரைவில் இப்படத்தின் புரோமோஷன் வேலைகள் ஆரம்பமாக உள்ளதாம். இந்தியா முழுவதும் படக்குழுவினர் சுற்றுப் பயணம் செய்வார்கள் எனத் தெரிகிறது.