ரேவதி இயக்கத்தில் பிரியாமணி, ஆரி புதிய வெப் தொடர்

80, 90 களில் முன்னணி நடிகையாக திகழ்ந்தவர் நடிகை ரேவதி. தமிழ், தெலுங்கு, ஹிந்தி, மலையாளம், கன்னடம் ஆகிய மொழிகளில் நடித்துள்ளார். இயக்குனராக ஹிந்தி மற்றும் மலையாள மொழிகளில் ஒரு சில படங்களை இயக்கியுள்ளார்.

தற்போது முதல்முறையாக ரேவதி தமிழில் ஒரு வெப் தொடரை இயக்கியுள்ளார். இதனை அவருடன் இணைந்து சித்தார்த் ராமசுவாமி என்பவரும் இயக்கியுள்ளார். இதில் முதன்மை கதாபாத்திரத்தில் பிரியாமணி, ஆரி அர்ஜூனன் ஆகியோர் நடித்துள்ளனர். அம்ரிதா ஸ்ரீனிவாசன், சம்பத் ஆகியோரும் முக்கிய கதாபாத்திரங்களில் நடித்துள்ளனர்.

இப்போது இந்த வெப் தொடரின் போஸ்ட் புரொடக்ஷன் பணிகள் நடைபெற்று வருகிறது. விரைவில் வெப் தொடரின் தலைப்பு, முதல் பார்வை, டீசர் ஆகியவை அடுத்தடுத்து வெளியாக உள்ளன. இந்த தொடர் ஹாட் ஸ்டார் ஓடிடி தளத்தில் ஒளிபரப்பாகும் என கூறப்படுகிறது.