புதிய படத்தில் ஜோடியாக மாறிய பிரேமலு நண்பர்கள்

கடந்த வருடம் மலையாளத்தில் வெளியான பிரேமலு திரைப்படம் மிகப்பெரிய வெற்றியை பெற்றது. கிரிஷ் ஏ.டி என்பவர் இயக்கியிருந்த இந்த படத்தில் மமிதா பைஜூ கதாநாயகியாக நடித்திருந்தார். நஸ்லேன் கதாநாயகனாக நடிக்க, அவருக்கு இணையான இன்னொரு முக்கிய நகைச்சுவை வேடத்தில் நடிகர் சங்கீத் பிரதாப் நடித்திருந்தார். குறிப்பாக கதாநாயகன் நஸ்லேனுக்கு நண்பராக மட்டுமல்லாமல், நாயகி மமிதா பைஜூவுக்கும் நண்பராக இவர் நடித்திருந்தார்.

இந்த நிலையில் தற்போது புதிய படம் ஒன்றில் மமிதா பைஜூ, சங்கீத் பிரதாப் இருவரும் இணைந்து ஜோடியாக நடிக்கின்றனர் இது குறித்த அதிகாரப்பூர்வ அறிவிப்பு நமீதா பைஜின் பிறந்தநாள் அன்று வெளியானது. டினோய் பவுலோஸ் என்பவர் இந்த படத்தை இயக்குகிறார். “ஒருவரை ஒருவர் எதிர்பாராத விதமாக ஆர்டர் பண்ணும் வரை காதல் என்பது ஒருபோதும் நம் மெனுவில் இருந்ததில்லை” என்கிற டேக்லைனை பார்க்கும்போது இதுவும் பிரேமலு பாணியில் ஜாலியான ஒரு காதல் படமாகவே உருவாகும் என தெரிகிறது.